Efla þarf kennslu í dönsku, sænsku og norsku
Niðurstaða norrænnar tungumálaráðstefnu sem haldin var dagana 27.-28. apríl var að nauðsynlegt væri að grípa til aðgerða til að tryggja norrænan tungumálaskilning. Að mati sérfræðinga eiga danska, sænska og norska að vera á stundatöflu nemenda frá 1. bekk grunnskóla
Skilningur á tungumálum grannlandanna minnkar á Norðurlöndum. Ef ef snúa á við þróuninni, verður kennsla í dönsku, sænsku og norsku að hefjast þegar í 1.bekk, standa yfir í meira en þrjú ár og notast sem inngangur að kennslu í öðrum tungumálum, til að mynda ensku.
- Ljósmyndari
- Johannes Jansson/norden.org
Tungumálaskilningur milli norrænu ríkjanna var í brennidepli á ráðstefnu sem Danir stóðu fyrir 27.-28. apríl, en þeir eru nú í forsæti Norrænu ráðherranefndarinnar. Þar var jafnframt fjallað um vaxandi þörf í löndunum fyrir fólk með kunnáttu í mörgum tungumálum.
Ráðstefnugestir komu hvaðanæva að af Norðurlöndum og sjálfsstjórnarsvæðunum Færeyjum, Grænlandi og Álandseyjum.
Tungumálið er burðarás menningarinnar, en sérfræðingar sem töluðu á ráðstefnunni voru sammála um að samnorrænn tungumálaskilningur hefði einnig gildi svo og fjölmargir aðrir þættir.
Til dæmis norræna velferðarlíkanið, efnahagsástand og ekki síst sambúð þjóðanna á Norðurlöndum.
Niðurstaða ráðstefnunnar var að þrátt fyrir að gripið hafi verið til aðgerða í hverju landi, þá dugi þær ekki til.
- Við gerum mikið til að styðja við kennslu í skandínavískum tungumálum. En gerum við nóg og getum við gert betur ?, spurði Tina Nedergaard menntamálaráðherra Dana meðal annars.
Á ráðstefnunni var einnig rætt um vaxandi þörf norrænu ríkjanna fyrir fólk með kunnáttu í mörgum tungumálum. Vigdís Finnbogadóttir fyrrverandi forseti og velgjörðarsendiherra UNESCO á sviði tungumála fjallaði um þetta á ráðstefnunni.
- Ég get sagt allt sem ég vil á mínu eigin tungumáli. En aðeins það sem ég get á erlendu tungumáli, sagði hún meðal annars í setningarræðu sinni.
Vigdís Finnbogadóttir sagði mikilvægi þess að kunna móðurmálið ótvírætt og eins að læra granntungumál eins fljótt og unnt er, því það væri góð undirstaða undir frekara tungumálanám
Einhugur var meðal þátttakenda í umræðum um að því fyrr sem tungumál frændþjóðanna verði liður í náminu, því auðveldara verði að læra önnur erlend tungumál
Niðurstaða ráðstefnunnar var því að kennsla í dönsku, sænsku og norsku verði að hefjast þegar í 1.bekk og standa yfir í meira en þrjú ár sem inngangur að kennslu í öðrum tungumálum, s.s. ensku. Öðru vísi batnaði ekki norrænn tungumálaskilningur.
Ráðstefnan "Nordisk sprog – sprog i Norden" markaði jafnframt upphaf á sameiginlegu norrænu tungumálaátaki sem stendur yfir næsta árið og er ætlað að auka tungumálaskilning milli norrænu ríkjanna, sér í lagi meðal ungs fólks.
Að lokum var kynnt til sögunnar ný vefsíða tungumálasamstarfsins:
Nýju vefsíðunni nordisksprogkoordination.org, er ætlað að tengja saman þræði norrænna tungumála fyrir þá sem starfa á því sviði og aðra sem áhuga hafa á. Gert er ráð fyrir að síðan verði opnuð um miðjan maí.
