Á gamlársdag getur hún litið til baka yfir viðburðaríkt ár sem forseti Norðurlandaráðs. Hún hefur farið margar ferðir til allra norrænu ríkjanna til þess að sitja fundi, en einnig til grannríkjanna.
- Á þessu ári hef ég náð að heimsækja Pétursborg, Syktyvkar, Chanty-Mansijsk og Vologda í Rússlandi.

Ef einhverjir eiga erfitt með að staðsetja þessar borgir á korti, þá viðurkenni ég að t.d. vissi ég ekki um Chanty-Mansijsk fyrr en ég fór þangað í júní. Borgin er hinum megin við Úralfjöll í Síberíu, nálægt fljótinu Ob.

Flestir tengja Síberíu við kulda og fátækt, en í Chanty-Mansijsk var hitabylgja og meiri velmegun en á mörgum öðrum stöðum vegna olíu- og gaslinda á svæðinu.

Ástæðan fyrir því að borgin ber tvö nöfn er sú, að áður en Rússar námu þar land fyrir nokkur hundruð árum síðan, bjó þar þjóðabrot af finn-úgrískum uppruna. Enn eru finnsk-úgrísk þjóðarbrot í borginni Syktyvkar í fylkinu Komi vestan megin Úralfjalla.

Það er sannarlega lærdómsríkt að sjá nýja heimshluta, en hver er pólitískur ávinningur Norðurlanda með auknum samskiptum við Rússa? Ég tel að hann sé mjög mikill, jafnvel þó að stundum hafi fundirnir ekki leitt til niðurstöðu.

Hugsið bara hvernig staðan var fyrir 18 árum síðan. Þá geisaði kalda stríðið enn í Evrópu. Með hverju árinu sem líður og í hvert sinn sem við eigum samskipti yfir landamærin, verður sá tími fjarlægari.

Enn í dag eru rússneskir þingmenn undir miklum áhrifum af því að hafa vaxið upp í mikilli vantrú á okkar heimshluta og jafnframt er fólk á Vesturlöndum sem enn telur að til séu fjandsamleg Sovétríki.

Í Bandaríkjunum er komin upp ný kynslóð sem Obama er fulltrúi fyrir og í Rússlandi er komin fram kynslóða stjórnmálamanna sem hafa mikinn áhuga á samskiptum við grannríki sín, einnig Norðurlöndin.

Við skulum ekki vera barnaleg. Rússar eiga enn nokkuð í land áður en lýðræði verður komið á, með fjölmiðlafrelsi og starfsemi frjálsra félagasamtaka. Hafa ber í huga að jafnvel þó Rússland sé gamalt ríki, þá er það eftir fall Sovétríkjanna rétt að slíta barnsskónum.

Í byrjun desember tók ég þátt í fundi í Volgoda þar sem þingmenn frá héraðsþingum í Norðvestur-Rússlandi hittust í PANWR, the Parliamentary Association of Northwest Russia.

Á síðastliðnu ári hafa myndast góð tengsl milli Norðurlandaráðs og þingmanna frá Norðvestur-Rússlandi. Almennt er hér um að ræða aukin samskipti á sviði verslunar og ferðaþjónustu milli Norðurlanda og Rússlands.

Enn má þó gera betur. Norrænir og rússneskir þingmenn hafa um margt ólíkar skoðanir, en oft stöndum við andspænis sömu úrlausnarefnum. Það á ekki síst við um efnahagskreppuna sem við glímum við í dag.

Því betur sem norrænir og rússneskir stjórnmálamenn kynnast, því betur skiljum við aðþað er eftir miklu að slægjast með þessum samskiptum.

Norðurlandaráð hefur einnig tengsl við rússneska þingið Dúmuna og sambandsráðið í Moskvu. Þau buðu til hringborðsumræðna í Chanty-Mansijsk, handan Úralfjalla.

Á næsta ári mun Norðurlandaráð vera gestgjafi á samskonar fundi í Björgvin. Þema fundarins verður orku- og umhverfismál. Enda þótt Rússar séu auðugir af olíu og gasi, þá geta þeir margt lært af öðrum um orkunýtingu.

Pólitískt séð hafa skilaboðin frá Rússlandi verið mótsagnakennd. Eftir síðustu sveitarstjórnarkosningar hafa heyrst gagnrýnisraddir, en í þeim voru t.d. einungis kjörnir fulltrúar tveggja flokka í Moskvu.

Á sama tíma hefur Medvedev foseti lagt fram margar tillögur til að endurnýja í rússneskt þjóðfélag og auka gagnsæi gagnvart umheiminum. Hann vill því slaka á reglum um vegabréfsáritanir svo auðveldara verði að komast inn í landið.

Framtíðin mun leiða í ljós hvort að eftir kreppu komi tímabil pólitískra umbreytinga, en kreppan með hefur reynst Rússum dýr vegna lækkandi hráefnisverða. Mikilvægt er að norrænir stjórnmaálmenn efli tengsl sín við rússneska kollega sína.