Hægur vandi að velja holla matvöru á Norðurlöndum
Norðurlandabúar eiga nú hægara með að velja hollar matvörur í verslunum. Á miðvikudag var norræna útgáfan af hollustumerkinu Skráargatið kynnt. Það hefur verið í notkun í Svíþjóð í 20 ár og er eitt það þekktasta á markaðnum.
Nú hafa Danmörk og Noregur einnig tekið hollustumerkið í notkun. Hugsanlegt er að Ísland bætist í hópinn seinna meir en Finnar hafa þegar svipað merki sem kallast Hjartamerkið.
Merkja má vörur sem innihalda lítið af t.d. fitu, salti og sykri með Skráargatinu. Markmiðið með sameiginlegu hollustumerki, sem er grænt skráargat á umbúðunum, er að auðvelda aðgengi neytenda að hollum matvörum. Í stað þess að reyna að skilja innihaldslýsingar á matvælaumbúðum, sem oft á tíðum eru óskýrar, á að vera hægt að sjá á auðveldan hátt hvort matvaran er holl. Nú er t.d. hægt að setja Skráargatið á mjólkurvörur, fisk, kjöt, grænmeti og brauð.
Ástæðan fyrir sameiginlegu hollustumerki er meðal annars svipuð matvælaúrval á Norðurlöndum auk þess sem Norðurlandabúar versla oft matvæli í grannlöndunum. Þó eru kaupvenjur ólíkar á margan hátt. Í rannsókn sem gerð var fyrir Norrænu ráðherranefndina kemur m.a. fram að Danir líta til fituinnihalds, Svíar hafa mestar áhyggjur af sykurinnihaldi en Norðmenn reyna að komast hjá of mikilli saltneyslu.
Skilyrði þess að vara sé merkt með Skráargatinu eru unnin hjá Norrænu ráðherranefndinni í samráði við norrænu næringarráðin. Halldór Ásgrímsson framkvæmdastjóri ráðherranefndarinnar styður sameiginlegt merki og segir það vera mikilvægt til að fylgja eftir norrænni framkvæmdaáætlun um mataræði og hreyfingu. Sameiginlegt merki auðveldar einnig viðskipti milli landanna, segir hann.
Matvælafyrirtækjum er í sjálfsvald sett hvort þau nota Skráargatið. Stjórnvöld í hverju landi fyrir sig bera ábyrgð á Skráargatinu.
