Norðurlandaráð beinir þeim tilmælum til ríkisstjórnanna að þær ýti úr vör aðgerðum til að tryggja öryggi á norðurslóðum hvort heldur í vistkerfinu eða meðal manna.

Ráðið vill sameiginlegt eftirlit á siglingaleiðum við Norðurskaut og efla samstarf um viðbúnað gegn slysum á norðurslóðum.

Norræn framleiðsla og innkaup í stórum stíl geta verið hagkvæm á mörgum sviðum, ekki síst þegar kemur að kostnaðarsömum innkaupum og verkefnum sem ná yfir stór svæði, eins og gildir um siglingaöryggi. Norðurskautsráðið samþykkti í maí svonefndan Search and Rescue-samning, sem á að treysta björgunarviðbúnað á Norðurskautssvæðinu. En betur má ef duga skal, sérstaklega hvað varðar forvarnir, að mati umhverfisnefndar Norðurlandaráðs.

„Ég sá sjálf í sumar, hvað náttúruöflin eru gífurleg. Við verðum að gera okkur grein fyrir því að sú hætta er fyrir hendi að ekki verði hægt að bjarga öllum, beri slys að höndum og því verðum við að leggja meiri áherslu á fyrirbyggjandi aðgerðir", sagði Ann-Kristine Johansson (S-Svíþjóð) á þingi Norðurlandaráðs í Kaupmannahöfn 3. nóvember.

Ráðið samþykkti fjölmargar tillögur til ríkisstjórnanna um Norðurskautssvæðið, þeirra á meðal að stofna sameiginlega stofnun um norðuhöf.

„Við getum náð langt með því að samhæfa það starf sem þegar er unnið hjá landhelgisgæslum landanna. Og norrænt samstarf á vettvangi Alþjóðasiglingamálastofnunarinnar sem heyrir undir Sameinuðu þjóðirnar getur til að mynda leitt af sér reglur um að stór farþegaskip megi ekki sigla án leiðsagnar um norðurhöfin, sem myndi verulega bæta siglingaöryggið", bætti Johansson við.

Fjöldi nýrra aðgerða

Ráðið vill einnig nýta norræna reynslu af mengunarvörnum á sjó til að smíða yfirgripsmikla alþjóðasamninga á vettvangi Sameinuðu þjóðanna.

Tvær af tillögum nefndarinnar koma í kjölfar skýrslu Stoltenbergs 2009 um aukið norrænt samstarf á sviði öryggis- og utanríkismála. Tillagan er því miður er ekki komin nægilega langt enn, að mati umhverfisnefndar Norðurlandaráðs.

Að endingu biður Norðurlandaráð um skýrslu þar sem skoðað verði hvaða fjármögnunarmöguleikar eru fyrir hendi til að tryggja betra eftirlit og björgunarviðbúnað í norðurhöfum.

Farþegasiglingar aukast sífellt í norðurhöfum og eftir því sem hafísinn bráðnar meir, má búast við að þær aukist enn frekar. Þess vegna verðum við að kanna hvort ekki sé mögulegt að krefja útgerða- og skipafélög um gjald til að tryggja þeirra eigin öryggi, að mati umhverfisnefndar Norðurlandaráðs.

Michael Funch
Sími +45 33960332
Tölvupóstur mifu@norden.org

Tryggvi Felixson
Sími +45 3396 0453
Tölvupóstur tfe@norden.org