Neikvæð umfjöllun grefur undan kennaranámi á Norðurlöndum – Ísland stendur upp úr
Neikvæð umfjöllun fjölmiðla er slæm fyrir kennaranámið. Sífellt færri hefja nám í faginu og er það ekki síst að kenna neikvæðri ímynd og skorti á góðum fyrirmyndum í fjölmiðlum. Þetta kemur fram í nýrri skýrslu frá Norrænu ráðherranefndinni um ástæður þess hversu erfitt er að fá ungt fólk til að hefja kennaranám á Norðurlöndum.
Eitt sinn var barnakennarinn mikilvægur einstaklingur í nærsamfélaginu. Kennarastarfinu fylgdi mikil virðing og vald
Í könnun sem Norræna ráðherranefndin hefur látið gera kemur fram að erfiðara er að laða ungt fólk að náminu vegna þess að kennarastarfið nýtur lítillar virðingar í samfélaginu.
Þátttakendur í könnuninni eru ungir námsmenn á Norðurlöndum. Skortur á góðum fyrirmyndum og nær engin jákvæð umfjöllun í fjölmiðlum eru nefndar sem helstu orsakir þess að ekki þykir eftirsóknarvert að verða kennari, sérstaklega í Danmörku, Noregi og Svíþjóð.
Finnland og að nokkru leyti Ísland standa upp úr í könnuninni, þar sem bæði kennaranámið og kennarastarfið fær betri fjölmiðlaumfjöllun í þessum löndum. Talið er að það hafi áhrif á hversu margir hefja kennaranám, ekki síst í Finnlandi.
- Fjölmiðlar hafa áhrif á virðingarstöðu kennarastarfsins og kennaranámsins í þjóðfélaginu. Í Danmörku, Svíþjóð og Noregi nefndu margir aðspurðra skort á fyrirmyndum í fjölmiðlum. Neikvæð fjölmiðlamynd er hins vegar ekki eins ofarlega í hugum ungs fólks og kennaranema í Finnlandi og á Íslandi. Mikilvægara virðist vera hvort sú mynd sem fjölmiðlar draga upp eigi sér hljómgrunn hjá ungu fólki, hvort það upplifir umfjöllun fjölmiðla sem öfgar sem það getur hafnað, eða hvort það tengir umfjöllunina við eigin skólagöngu. Niðurstöður skýrslunnar eru engu að síður þær að leggja þarf aukna áherslu á að gera jákvæðar kennarafyrirmyndir sýnilegar og setja af stað herferðir sem mótvægi við neikvæðri umfjöllun fjölmiðla. Slíkt gæti haft áhrif á dagskrá stjórnmála og hjálpað til við að laða nýja nema að kennaranáminu.
Laun eru einnig ástæða fyrir því að ungt fólk kýs að fara ekki í kennaranám.
Byrjunarlaun kennara í norrænu ríkjunum eru nokkurn veginn þau sömu, en jafnvel þó þau séu ekki hærri í Finnlandi en í öðrum löndum, er sú virðing sem tengist kennarastarfinu nægileg ástæða til að starfið er álitið aðlaðandi.
Skýrslan byggir á viðtölum og könnunum meðal menntaskólanema og kennaranema í norrænu ríkjunum fimm og er gerð af Danmarks Evalueringsinstitut og Danska Kennaraháskólanum í Árósum fyrir Norrænu ráðherranefndina.
Tengiliðir
Michael Funch
Sími
+45 33960332
Tölvupóstur
mifu@norden.org
