Document Actions

Reykjavíkurborg hlýtur Náttúru- og umhverfisverðlaun Norðurlandaráðs 2014

Reykjavíkurborg hlýtur Náttúru- og umhverfisverðlaun Norðurlandaráðs 2014. Verðlaunaafhending Norðurlandaráðs fór fram í Stokkhólmi.

29.10.2014
Ljósmyndari
Magnus Fröderberg/norden.org

Náttúru- og umhverfisverðlaun Norðurlandaráðs nema 350 þúsund danskra króna. Þau voru afhent af verðlaunahafa síðasta árs, Selina Juul, í ráðhúsinu í Stokkhólmi. Hún las jafnframt upp rökstuðning dómnefndarinnar:

Rökstuðningur

„Reykjavíkurborg hlýtur verðlaunin fyrir víðtækt og markvisst starf sveitarfélagsins að umhverfismálum Það sama má segja um ýmsa aðra af þeim sem tilnefndir voru, en Reykjavíkurborg hefur einnig gert ýmislegt sem hún er ein um og sem getur orðið öðrum innblástur.

Reykjavík hefur náð góðum árangri á mörgum sviðum. Íbúafjöldinn og landfræðileg lega borgarinnar hefur hjálpað til, en mikið af því markverðasta sem gert hefur verið má rekja til aðdáunarverðra og markvissra aðgerða.

Í Reykjavík hefur um langt skeið verið unnið að þróun umhverfisvænnar nýtingar neysluvatns og framleiðslu fjarvarma og rafmagns með hjálp jarðhita. Borgin hefur jafnframt framfylgt þeirri stefnu að nota svæði sem ekki eru nýtt til annars, eða þar sem á að byggja síðar, í „grænum“ tilgangi til að koma í veg fyrir að þau verði gerð að bílastæðum. Og þrátt fyrir að Reykjavík sé lítil borg ganga 87% ökutækja sveitarfélagsins fyrir rafmagni eða gasi. Við vitum ekki af neinum sveitarfélögum sem hafa nálægt því eins umhverfisvænan bílaflota.

Reykjavíkurborg hefur um langt skeið átt í samstarfi um eftirlit og verndun vatnsbóla og er nú eina höfuðborg Norðurlanda þar sem öll hús hafa aðgang að ómeðhöndluðu drykkjarvatni í háum gæðaflokki.

Vegna þess víðtæka umhverfisstarfs sem innt er af hendi með langtímasjónarmið að leiðarljósi, markvissrar vinnu með umhverfisvæna nýtingu neysluvatns og framleiðslu fjarvarma og rafmagns með hjálp jarðhita er Reykjavíkurborg verðugur handhafi Náttúru- og umhverfisverðlauna Norðurlandaráðs 2014.“

Þema Náttúru- og umhverfisverðlauna Norðurlandaráðs 2015

 Náttúru- og umhverfisverðlaun Norðurlandaráðs 2015 verða veitt fyrirtæki, samtökum eða einstaklingi sem, með vinnubrögðum sem geta orðið öðrum fyrirmynd, hefur þróað vöru eða uppfinningu eða sem á annan hátt hefur stuðlað að því með nýskapandi framtaki að draga úr losun gróðurhúsalofttegunda á Norðurlöndum til framtíðar.“

Tengiliðir

Frøydis Johannessen
Sími +45 21 71 71 44
Netfang frjo@norden.org