Skapandi nám hefur góð áhrif á PISA-niðurstöður
Norrænir stjórnmálamenn nýta góðan árangur menningarskóla í Noregi. Dans og leiklist á að stuðla að því að auka þátttöku og efla nemendur á Norðurlöndum.
Norrænir stjórnmálamenn hafa gert könnun á því hvaða áhrif skapandi námsgreinar, eins og leiklist og dans, hafa á líðan og árangur nemenda í bóklegum greinum. Niðurstöðurnar eru óyggjandi.
- Nemendurnir sýna meiri ábyrgð í námi og framsetning þeirra á námsefninu verður betri þegar þeir eiga kost á að velja skapandi greinar. Þeir ná einnig betri árangri í móðurmáli og stærðfræði, og sést það greinilega í PISA-könnunum segir Mogen Jensen formaður Menningar- og menntanefndar Norðurlandaráðs.
Sköpun og nýsköpun er mikilvæg færni, ef Norðurlönd eiga að styrkja samkeppnisstöðu sína og efnahagsvöxt. Þess vegna bendir Norðurlandaráð á mikilvægi þess að skapandi námsgreinar verði á stefnuskrá í menntamálum á Norðurlöndum.
Norðurlandaráð lét sérstaklega kanna umfang og áhrif skapandi námsgreina á Íslandi, í Noregi og Finnlandi. Og menningarskóla-líkanið í Noregi er það umfangsmesta. Alls er um að ræða 407 skóla í öllum sveitarfélögum landsins.
Mikilvægi skapandi námsgreina í skólastarfi fær nú aukna athygli á alþjóðavettvangi, ekki síst vegna þess að UNESCO hefur sett listir í skólastarfi á stefnuskrá sína. Þá hefur framkvæmdastjórn ESB ákveðið að 2009 verði ár sköpunar og bretar hafa ýtt úr vör verkefninu Sérhver skóli á að vera tónlistarskóli ’ og lagt verkefninu til 332 milljónir sterlingspunda.
- Á undanförnum árum hefur áhersla grunnskólanna á PISA, eftirlit og samkeppni haft í för með sér, að ekki hefur verið gætt að lýðræðislegum og félagslegum gæðum í skólastarfi. Við höfum nú meira en nokkru sinni þörf fyrir færni á sviði sköpunar og nýsköpunar. Menntaumræðan snýst í augnablikinu um niðurstöður úr alþjóðlegum þekkingarkönnunum, sem eiga það til að mæla eingöngu bóklegar námsgreinar, útskýrir Risto Autio, fulltrúi Finnlands í menningar og menntanefndinni.
Í könnuninni hefur Norðurlandaráð kortlagt mörg dæmi sem sýna fram á að skapandi starf bætir náms- og kennsluumhverfið. Aftur á móti er ekki til þekking í öllum löndum um hvernig kennarar, yfirstjórn og skólaumgjörðin getur stuðlað að betri árangri.
- Markmiðið er ekki að allir nemendur verði listamenn. List og menning eru verðmæti sem geta aukið vellíðan og gæði náms og Norðurlönd standa sig nú þegar vel. En það er þörf á sameiginlegu átaki og samræmi milli landanna, sem getur bætt árangurinn enn frekar, segir formaður nefndarinnar Mogens Jensen að lokum.
