Norðurlöndin eiga ekki einvörðungu að beita sér fyrir því að íbúar Vestur-Sahara öðlist sjálfstjórn, UNR vill einnig að norrænu ríkin þrýsti á Marokkó um að virða mannréttindi. Marokkó hernam Vestur-Sahara árið 1975 og frá þeim tíma hefur mikill hluti íbúa Vestur-Sahara búið í flóttamannabúðum í eyðimörkinni í Alsír.

"Þetta er mikilvægt málefni. Á meðan heimurinn lokar augunum fyrir ástandinu í Vestur-Sahara er auðveldara fyrir Marokkó að halda hernáminu til streitu og ganga á mannréttindi. Vegna þess að Norðurlöndin eru velstæð og velferð er þar mikil, er mikilvægt að nýta tíma og krafta í málefni utan okkar landamæra", segir Marianne Granheim Troyflat fulltrúi Sambands norræna ungliðahreyfinga miðflokkanna.

Frá því að frelsishreyfingin í Vestur-Sahara, Front Polisarion, lýsti yfir sjálfstæði Vestur-Sahara, hafa um 70 lönd viðurkennt landið sem sjálfstætt ríki. Þrátt fyrir það nýtir Marokkó náttúruauðlindir Vestur-Sahara og þess vegna biður Norðurlandaráð æskunnar norrænu ríkin um að leita árangursríkra leiða til að stöðva samstarf norrænna fyrirtækja og atvinnulífs við Marokkó á hernumda svæðinu.

"Mikil samstaða er um að viðurkenna eigi Vestur-Sahara sem sjálfstætt ríki í ungliðahreyfingunum í Noregi og UNR er mikilvægur vettvangur til að vekja athygli á stöðu íbúa Vestur-Sahara", segir Troyflat.

Oft er talað um ástandið í Vestur-Sahara sem eina af þeim deilum sem gleymst hefur í heiminum.

Norðurlandaráðsþing æskunnar einkennist að þessu sinni af því að litið er til umheimsins út fyrir eigin landamæri. Þróunarsamstarf, Afghanistan og fjármögnun loftslagsniðurskurðar í fátækum löndum voru meðal málefna sem rædd voru á Norðurlandaráði æskunnar í þinghúsinu í Stokkhólmi dagana 23.-25. október.