1996 Øystein Lønn, Noregur: Hva skal vi gjøre i dag? og andre noveller

Øystein Lønn er fæddur á Kristjánssandi í Suður-Noregi. Fyrsta smásögusafn hans kom út árið 1966. Hann hefur löngum notið virðingar annarra rithöfunda en verið lítt þekktur meðal almennings fyrr en hann hlaut Brage-verðlaunin árið 1993 fyrir smásögusafnið Thranes metode. Honum er lýst sem frábærum og glöggum stílista sem kryfur líf venjulegs fólks til mergjar og hefur sérstakt auga fyrir grámyglulegu lífi nútímamanneskjunnar.

Hva skal vi gjøre i dag? og andre noveller virðist á yfirborðinu ósköp venjuleg frásögn þar sem svo sem ekkert gerist. Lønn beitir þeirri frásagnartækni til að afhjúpa það sem leynist undir yfirborði nútímamanneskjunnar. Smásögurnar gerast á undanförnum fjörutíu árum og segja frá fjórum rosknum einstaklingum. Þrjú þeirra hafa notið velgengni í starfi en einhverra hluta vegna verða þau fyrir því að missa vinnuna. Vinahjón undirbúa ferðalag til Nýju Gíneu og vonast þannig til að endurheimta lífsgleðina. Sögurnar byggjast á því sem liggur á milli línanna - þögnin í samtölunum laðar fram persónuleika fólksins. Stílbrögð frásagnarinnar felast meðal annars í því að lýsa persónunum gegnum hugsanir annarra.

Hva skal vi gjøre i dag? og andre noveller

Útgáfa: Gyldendal Norsk Forlag 

Útgáfuár: 1995

Næmt auga fyrir því sem leynist undir yfirborði textans hefur alltaf einkennt verk Øysteins Lønn. Hann er óumdeildur meistari tvíræðinna orðaskipta. Í Hva skal vi gjøre i dag? ýkir hann spennuna milli einkalífs fólks og samfélags sem erfitt er að botna í.