Einstaklingar eiga oft rétt á greiðslum í fæðingarorlofi. Réttindin eru háð aðstæðum viðkomandi.

Upplýsingar um lengd fæðingarorlofs eru á heimasíðu Halló Norðurlanda um fæðingarorlof í Danmörku.

Ef einstaklingur starfar í Danmörku

Ef einstaklingur starfar í Danmörku er hann undir venjulegum kringumstæðum aðili að almannatryggingarkerfinu og á þá rétt á fæðingarorlofsgreiðslum samkvæmt dönskum reglum.

Laun í fæðingarorlofi

Sumir starfsmenn eiga rétt á launum í fæðingarorlofi.

Ef einstaklingur á rétt á launum kemur það fram í kjarasamningum milli stéttarfélags hans og vinnuveitanda eða í ráðningarsamningi.

Þar kemur einnig fram upphæð greiðslna. Sumir eru á launum í allt að 52 vikur á meðan aðrir fá full laun, eða nærri full laun, í 14 vikur.

Fæðingarorlofsgreiðslur

Ef einstaklingur er í vinnu og á ekki rétt á launum í fæðingarorlofi, á hann venjulega rétt á fæðingarorlofsgreiðslum.

Til þess að eiga rétt á fæðingarorlofsgreiðslum verður viðkomandi að uppfylla kröfur um starfstíma.

Það þýðir að hann þarf að hafa unnið hið minnsta 120 tíma síðustu 13 vikurnar áður en fæðingarorlof hefst. Þar skal vera um að ræða föst tengsl við vinnumarkaðinn. T.d. er ekki nóg að vera afleysingastarfsmaður sem ekki er með tryggða atvinnu.

Upphæð greiðslna í fæðingarorlofi miðast við tímalaun og fjölda vinnustunda. Þó er um að ræða hámarksupphæð á viku. Hafið samband við sveitarfélagið um vafamál eða spurningar um útreikning dagpeninga.

• Nánari upplýsingar um fæðingarorlof og fæðingarorlofsgreiðslur eru á borger.dk.

Ef einstaklingur er atvinnulaus

Ef einstaklingur fær dagpeninga

Ef einstaklingur er atvinunlaus og fær atvinnuleysisbætur á hann sjálfkrafa rétt á fæðingarorlofsgreiðslum í fæðingarorlofi.

Ef einstaklingur fær fjárhagsaðstoð eða upphafsstyrk

Ef einstaklingur fær fjárhagsaðstoð eða upphafsstyrk, er meginreglan sú að hann eigi rétt á þessari greiðslu jafn lengi og launþegar eiga rétt á fæðingarorlofsgreiðslum. Á meðan á fæðingarorlofi stendur er viðkomandi ekki skyldugur að taka tilboðum um vinnu.

Ef einstaklingur fær ekki greiðslur

Ef einstaklingur er atvinnulaus og fær ekki fjárhagsaðstoð eða upphafsstyrk á hann ekki rétt á fæðingarorlofsgreiðslum. Krafan er að viðkomandi hafi tengsl við vinnumarkaðinn og uppfylli ákveðnar kröfur um atvinnu.

• Nánari upplýsingar um fæðingarorlof og fæðingarorlofsgreiðslur eru á borger.dk.

Ef einstaklingur er námsmaður

Ef einstaklingur fær námsstyrk (SU)

Ef einstaklingur verður barnshafandi á meðan á æðri menntun stendur og fær námsstyrk, getur viðkomandi fengið aukastyrk (SU-klip) í 12 mánuði.

Því skal ekki sækja um leyfir frá námi í tengslum við meðgöngu.

Viðkomandi skal sjálf sækja um aukastyrk á SU-skrifstofu á námsstað. Þar skal framvísa fæðingarvottorði, meðgönguskýrslu eða álíka.

Faðir barnsins getur fengið 6 SU-einingar í viðbót.

Ekki er nauðsynlegt að stunda nám á meðan fæðingareiningar eru greiddar. En nauðsynlegt er að vera áfram skráður í nám.

Ef einstaklingur fær ekki námsstyrk (SU)

Námsmenn eiga aldrei rétt á fjárhagsaðstoð, en við ákveðnar aðstæður geta einstaklingar fengið fæðingarorlofsgreiðslur ef þeir uppfylla kröfu um að hafa unnið hið minnsta 120 tíma síðust 13 vikurnar og eru í starfi þegar fæðingarorlof hefst.

• Nánari upplýsingar hjá námsráðgjöfinni (Studenterrådgivningen) í bæklingi um fæðingarorlof fyrir námsmenn [pdf].

Fæðingarorlofsgreiðslur til eða frá útlöndum

Ef einstaklingur fær fæðingarorlofsgreiðslur í Danmörku, mun hann fá greiðslur áfram frá sveitarfélaginu í Danmörku, þó hann flytji til útlanda.

Þá á einstaklingur einnig rétt á fæðingarorlofsgreiðslum frá eigin heimalandi ef viðkomandi flytur eftir að fæðingarorlof hefst.

Nánar um reglur annarra landa:

• Fæðingarorlofsgreiðslur frá Finnlandi
• Fæðingarorlofsgreiðslur frá Íslandi
• Fæðingarorlofsgreiðslur frá Noregi
• Fæðingarorlofsgreiðslur frá Svíþjóð

Ef einstaklingur flytur milli norænna ríkja áður en fæðingarorlof hefst og nær ekki að ávinna sér rétt til fæðingarorlofsgreiðslna í því ríki sem flutt er til, á viðkomandi á hættu að eiga ekki rétt á greiðslum hvorki frá landi sem flutt var frá né landi sem flutt er til.