Réttindi neytenda

Neytendalögin

Viss réttindi fylgja því þegar keypt er vara í Danmörku.

• Kvörtunarréttur er tvö ár. Það þýðir að kvarta má við seljanda vegna galla og ef varan uppfyllir ekki skilyrði, í tvö ár.
• Skilaréttur á vöru er ekki sjálfgefinn. Einungis er hægt er að skipta vöru eða fá peninga greidda tilbaka ef verslunin býður það.
• Ef varan er gölluð eða eitthvað vantar í hana, á neytandinn rétt á að fá hana viðgerða eða skipt í nýja. Stundum er hægt að fá peninga endurgreidda eða afslátt af verðinu.
• Verslunin má einungis reyna að laga eða skipta vörunni nokkrum sinnum - yfirleitt einu sinni eða tvisvar. Eftir það verður hún að endurgreiða vöruna.

Réttindi neytenda eru skráð í neytendalögin Købeloven. Upplýsingar eru hjá Samkeppnis- og neytendastofnun í bækling um lögin guide til loven á vefsíðu stofnunarinnar styrelsens netsted.

Neytendastofnanir

Þeim sem vilja kynna sér betur réttindi neytenda í Danmörku er bent á að hafa samband við Neytendasamtökin Forbrugerrådet. Samtökin veita einnig ráðgjöf vegna kvartana.

Spurningum um verslun yfir landamæri innan ESB og EES-ríkjanna, skal beina til skrifstofunnar Forbruger Europas danske kontor.

Útvarps- og sjónvarpsáskrift

Samkvæmt lögum skulu allir 18 ára og eldri greiða útvarps- og sjónvarpsáskrift eigi þeir viðtæki sem tekur á móti og endurkastar útvarpi, sjónvarpi; hvort heldur viðtækið er í notkun eður ei.

Þetta þýðir að einstaklingar greiða áskriftargjald fyrir heimili ef viðtæki er í íbúðinni, sumarhúsinu, bílnum og/eða bátnum.

Í Danmörku eru tvær tegundir áskrifta fyrir einstaklinga: fjölmiðlaáskrift og útvarpsáskrift.

Hvert heimili greiðir eina áskrift sem nær til allra viðtækja heimilisfólks.

Tilkynna skal um áskrift í síðasta lagi 14 dögum eftir að viðtæki er keypt.

Fjölmiðlaáskrift

Eigi einstaklingur eitt eða fleiri af þessum viðtækjum, skal greiða fyrir fjölmiðlaáskrift.

• Sjónvarp eða samsvarandi viðtæki
• Tölvu með aðgengi að alnetinu eða öðru neti með vistunarhraða 256 Kbit/s eða meira
• Tölvu með tæki, til að mynda sjónvarpsstillingu, sem getur tekið á móti sjónvarpi í gegnum útvarpsbylgjur eða net
• Farsíma með aðgangi að alnetinu
• Lófatölvu (PDA) og önnur tæki sem geta tekið á móti þráðlausum sendingum og sýnt myndþætti og - þjónustu

Útvarpsáskrift

Útvarp fellur einnig undir fjölmiðlaáskrift, en þeir sem einungis eiga útvarp, þurfa eingöngu að greiða fyrir útvarpsáskrift.

Stafrænt sjónvarp

Allar sjónvarpsútsendingar í Danmörku hafa verið stafrænar frá 1. nóvember 2009. Það þýðir að kaupa þarf stafrænan móttakara til að geta horft á sjónvarp í Danmörku ef sjónvarp viðkomandi getur ekki tekið á móti stafrænum sendingum.

Farsímaáskrift

Eingöngu þeir sem skráðir eru í þjóðskrá í Danmörku geta keypt farsímaáskrift þar.

Þeir sem vilja fá danskt farsímanúmer án þess að vera skráðir í þjóðskrá, geta nýtt sér fyrirframgreitt farsímakort sem fást í söluturnum og á bensínstöðvum.

Rafmagn, gas, vatn og hiti

Engin krafa er gerð um skráningu í þjóðskrá folkeregistreret í Danmörku til þess að gerast viðskiptavinur fyrirtækisins Københavns E sem selur rafmagn, gas, vatn og hita á höfuðborgarsvæðinu.

Allir sem búa í Danmörku geta fengið aðgang að rafmagni, gasi, vatni og hita.

Bensínkort

Mörg olíufélög gefa út sérstök afsláttarkort (bensínkort) sem nýta má við kaup á bensíni, þjónustu og vöru á bensínstöðvum.

Nauðsynlegt er að vera skráður í folkeregistreret í Danmörku til að geta fengið danskt bensínkort.

Hjá mörgum alþjóðlegum olíufélögum er þó unnt að nýta kort sem gefið er út erlendis. Upplýsingar um hvort hægt sé að nota kort í Danmörku, fást hjá því fyrirtæki sem gaf út kortið.