Leikskóli og bætur til foreldra smábarna í Noregi
Leikskólar í Noregi og hvernig sótt er um leikskólavist? Hvaða bætur eru í boði (kontantstøtte) og hverjir geta fengið þær? Eftirfarandi eru upplýsingar um umönnun barna í Noregi.
- Ljósmyndari
- Johannes Jansson/norden.org
Leikskóli
Sveitarfélög í Noregi bera ábyrgð á leikskólum. Þar eru bæði einkareknir leikskólar og leikskólar sem reknir eru af hinu opinbera fyrir börn á aldrinum 1-5 ára. Umsóknum um leikskólavist skal skila á þar til gerðu eyðublaði sem fæst í leikskólanum eða hjá sveitarfélaginu. Leikskólagjöld og inntökureglur geta verið mismunandi milli leikskóla, en stjórnvöld hafa ákveðið hámarksupphæð sem foreldrar þurfa að greiða fyrir heilsdagsvistun. Nánar um það á vefsíðu menntamálaráðuneytisins: Kunnskapsdepartementet.
Venjulega eru börn tekin inn í leikskóla einu sinni á ári, að vori. Nánari upplýsingar fást hjá því sveitarfélagi sem viðkomandi býr í eða hyggst flytja til. Ekki er hægt að sækja um leikskólapláss fyrr en barnið hefur fengið kennitölu (fødselsnummer), eða tímabundna kennitölu. Upplýsingar um heimilisföng og símanúmer hjá leikskólum í Noregi (einka- og ríkisreknum) eru á vefsíðunni Norsk skoleinformasjon.
Nýjar reglur um leikskólavist barna tóku gildi 1.1.2009. Reglurnar kveða á um réttindi barna til leikskólavistar sem orðin eru eins árs í lok ágústmánaðar, árið sem sótt er um leikskólavist Börn skulu fá leikskólavist frá ágústmánuði árið sem sótt er um. Börn sem fædd eru í september og seinna eiga rétt á leikskólavist frá ágústmánuði árið eftir.
Fjárstuðningur til foreldra smábarna
Fjárstuðningur er veittur vegna barna á aldrinum eins til þriggja ára og ættleiddra barna sem ekki hafa hafið skólagöngu. Bæturnar eru veittar að hámarki í 23 mánuði og barnið má ekki vera í heilsdagsvistun í leikskóla sem rekinn er með opinberum fjárstuðningi. Sé barnið í leikskóla hluta úr degi er hægt að fá bætur að hluta. Hægt er að fá fjárstuðning vegna ættleiddra barna í allt að 23 mánuði eftir að bótatímabil fullra ættleiðingarbóta hefur runnið sitt skeið, jafnvel þó barnið hafi orðið þriggja ára á tímabilinu, þó með því skilyrði að barnið hafi ekki hafið skólagöngu.
Grunnreglan er sú að barnið búi í Noregi. Barnið telst búa í Noregi hafi það dvalið þar í meira en 12 mánuði. Í einstaka tilvikum er veittur fjárstuðningur við tímabundna dvöl í útlöndum í allt að þrjá mánuði. Í einstökum tilvikum er einnig veittur fjárstuðningur vegna barna sem búsett eru í öðru EES-ríki ef fyrirvinna þess starfar í Noregi, á norsku skipi eða á norska landgrunninu, þiggur eftirlaun frá Noregi vegna starfs eða er launþegi sem sendur er frá Noregi til starfa erlendis.
Nánar um fjárstuðning og möguleika á að fá hann greiddan erlendis á vefsíðu NAV.
