Reglur um skráningu í þjóðskrá í Svíþjóð

Ef einstaklingur, sem er ríkisborgari í norrænu ríki, hyggst dvelja í Svíþjóð í meira en 12 mánuði, skal hann skrá sig í þjóðskrá.

Hann getur, sem ríkisborgari norræns ríkis, dvalið í Svíþjóð í allt að eitt ár án þess að skrá sig í þjóðskrá.

Að tilkynna flutning til Svíþjóðar frá öðru norrænu ríki

Einstaklingur sem flytur til Svíþjóðar frá öðru norrænu ríki, skal tilkynna flutning til Svíþjóðar áður en vika er liðin. Það gerir hann persónulega hjá Skatteverket.

Viðkomandi verður skráður í þjóðskrá í Svíþjóð frá þeim degi sem gefinn er upp sem flutningsdagur og Skatteverket tilkynnir um þetta til brottflutningslandsins.

Ef viðkomandi tilkynnir flutning til Svíþjóðar eftir að vika er liðin frá raunverulegum flutningsdegi, verður hann skráður í þjóðskrá í Svíþjóð frá þeim degi sem tilkynnt er um flutning.

Hvað skal hafa meðferðis

Hafa skal vegabréf meðferðis þegar tilkynnt er um flutning hjá Skattaverket. Sé vegabréf ekki haft meðferðis, heldur önnur gild skilríki, verður flutningsdagur skráður þann dag sem ákvörðun er tekin um flutning.

Að auki skal hafa meðferðis skjöl sem staðfesta hjúskaparstöðu og fæðingarvottorð barna, ef einhver eru.

Þurfi viðkomandi á aðstoð túlks að halda skal upplýsa um það með fyrirvara.

Að tilkynna landinu sem flutt er frá

Danmörk – Þegar flutt er frá Danmörku til Svíþjóðar skal bæði tilkynna flutning til þjóðskrár í búsetusveitarfélagi í Danmörku og þjóðskrá í Svíþjóð. Verði flutningur til Svíþjóðar samþykktur telst viðkomandi sjálfkrafa fluttur frá Danmörku. Sömu reglur eiga við um börn.

Finnland – Þegar flutt er frá Finnlandi til Svíþjóðar skal bæði tilkynna brottflutning til Befolkningsregistercentralen og flutning til þjóðskrár í Svíþjóð. Verði flutningur til Svíþjóðar samþykktur telst viðkomandi sjálfkrafa fluttur frá Finnlandi. Sömu reglur eiga við um börn.

Ísland – Flutning frá Íslandi til Svíþjóðar skal einungis tilkynna í Svíþjóð. Verði flutningur til Svíþjóðar samþykktur telst viðkomandi sjálfkrafa fluttur frá Íslandi. Sömu reglur eiga við um börn.

Noregur – Flutning frá Noregi til Svíþjóðar skal einungis tilkynna í Svíþjóð. Verði flutningur til Svíþjóðar samþykktur telst viðkomandi sjálfkrafa fluttur frá Noregi. Sömu reglur eiga við um börn.

Skráning barna í þjóðskrá

Sömu reglur gilda fyrir börn og fullorðna um skráningu í þjóðskrá, með þeirri undantekningu að ef börn fylgja fullorðnum þurfa þau ekki eigið vegabréf. Nægilegt er að framvísa fæðingarvottorði. Komi barnið til Svíþjóðar eitt síns liðs, skal framvísa vegabréfi.

Kennitala

Allir einstaklingar sem skráðir eru í þjóðskrá í Svíþjóð fá kennitölu. Einstaklingar sem einu sinni hafa fengið kennitölu, halda henn i ævilangt, jafnvel þó þeir flytji frá Svíþjóð.

Samræmingartala

Ef fólk ætlar að stunda vinnu í Svíþjóð í skemmri tíma en eitt ár og hefur ekki áður verið skráð í þjóðskrá er hægt að nota samræmingartölu. Samræmingartöluna nota yfirvöld og aðrir aðilar til að bera kennsl á fólk þótt það sé ekki skráð í þjóðskrá. Skatteverket úthlutar fólki samræmingartölu þegar það skráir sig hjá skattinum. Ef fólk ákveður síðar að skrá sig í sænska þjóðskrá fær það kennitölu í stað samræmingartölunnar.

Ef viðkomandi er ekki ESB- eða EES-borgari

Ef viðkomandi er ekki borgari í ESB- eða EES-landi verður hann að sækja um dvalarleyfi til þess að fá leyfi til að búa í Svíþjóð. Það er annað hvort hægt gera í sænsku sendiráði eða hjá ræðismanni Svíþjóðar í því landi sem flutt er frá, eða hjá Migrationsverket (Innflytjendastofnun) eftir komuna til Svíþjóðar.

Meðfylgjandi börn frá ríkjum utan ESB og EES-svæðisins skulu einnig hafa meðferðis vegabréf eða önnur skilríki með ljósmynd.

Almennt um skráningu í þjóðskrá

Einungis er hægt að vera skráður í þjóðskrá í einu landi í einu. Sé einstaklingur í vafa um hvort hann skuli skrá sig í þjóðskrá í Svíþjóð, gilda reglur landsins sem flutt er til.

Ef einstaklingur er skráður í þjóðskrá í Svíþjóð þýðir það venjulega að viðkomandi er sjúkratryggður í Svíþjóð. Þó eru undantekningar frá þessari reglu, m.a. ef viðkomandi er námsmaður eða ef hann var ekki sjúkratryggður í brottflutningslandinu. Ef viðkomandi er ekki viss um hvort hann er sjúkratryggður í Svíþjóð, skal hann hafa samband við sænsku stofnunina um félagslegar tryggingar, Försäkringskassan.

Þegar einstaklingur skráir sig í þjóðskrá í Svíþjóð, fellur félagsleg trygging viðkomandi í brottflutningslandinu úr gildi. Hafa skal samband við Försakringskassan í Svíþjóð og tryggja að viðkomandi sé félagslega tryggður í Svíþjóð.

Sænskt nafnskírteini

Þegar einstaklingur skráir sig í þjóðskrá í Svíþjóð, getur hann jafnframt sótt um sænskt nafnskírteini. Skírteinið er notað til þess að staðfesta aldur og til þess að sanna hver viðkomandi er við ýmsar aðstæður. T.d. þegar hann sækir lyf í lyfjaverslun, greiðir með greiðslukorti í verslun eða stundar viðskipti í banka. Sænskt nafnskírteini er pantað hjá Skatteverket.