Document Actions

Framhaldsskólanám í Finnlandi

Upplýsingar um framhaldsskólanám eða annað nám að loknum grunnskóla.

löpende
Ljósmyndari
Magnus Fröderberg/norden.org

Einstaklingur sem lokið hefur grunnskólaprófi eða öðru sambærilegu námi, í Finnlandi eða annarsstaðar, getur sótt um inngöngu í finnskan framhaldsskóla.

Til finnskra framhaldsskóla teljast menntaskólar, sem veita alhliða bóklega menntun, og iðnskólar, sem veita menntun í verklegum greinum.  Einnig er mögulegt að ljúka tvöföldu prófi með samfléttun menntaskóla- og verknáms.

Umsóknartími í framhaldsskóla er að vori gegnum vefsvæðið Opintopolku.fi. Samkvæmt Norræna samningnum um æðri menntun hafa borgarar allra Norðurlandanna sama rétt og Finnar til að sækja um inngöngu í finnska framhaldsskóla.

Hægt er að sækja um finnskan námsstyrk til framhaldsskólanáms, að fullorðinsfræðslu undanskilinni. Í mörgum framhaldsskólum fá nemendur heita máltíð í hádeginu án endurgjalds.

Nánari upplýsingar um námsmöguleika á mismunandi stigum finnska menntakerfisins eru aðgengilegar á vefsvæðinu Opintopolku.fi.

Menntaskólar

Finnskir menntaskólar veita alhliða bóklega menntun. Meðallengd námsins er þrjú ár og því lýkur alla jafna með stúdentsprófi. Menntaskólagengnir nemendur hafa rétt til áframhaldandi náms á háskólastigi, bóklegs eða verklegs.

Menntaskólar eru ýmist ríkis- eða einkareknir, en námið er ávallt án endurgjalds. Nemendur þurfa þó sjálfir að verða sér úti um námsefnið.

Í finnskum menntaskólum er yfirleitt kennt á finnsku eða sænsku. Í stærri borgum eru einnig alþjóðlegir menntaskólar, þar sem stunda má nám á t.d. ensku, þýsku eða frönsku.

Sótt er um inngöngu í menntaskóla gegnum sameiginlegt umsóknakerfi á vefsvæðinu Opintopolku.fi.

Nánari upplýsingar um framhaldsskólanám eru á vef Fræðsluráðs í Finnlandi.

Verkmenntun

Verkmenntun er nátengd atvinnulífinu og miðar að því að ljúka prófi í tiltekinni iðngrein. Prófi má ýmist ljúka með námi í verklegum greinum, með stöðuprófum og námsmati eða á námssamningi.

Bæði ungt fólk og fullorðið getur sótt um inngöngu í grunnnám í verklegum greinum. Slíkt nám er m.a. í boði í iðnskólum og fullorðinsfræðslumiðstöðvum. Auk kennslu í verklegum greinum samanstendur námið af almennri bóklegri menntun, valfrjálsum námskeiðum og yfirleitt einnig starfsnámi. Samhliða námi í verklegum greinum er hægt að stunda menntaskólanám eða gangast undir stúdentspróf.

Sá möguleiki að ljúka prófi gegnum stöðupróf og námsmat er ætlaður fullorðnum sem þegar hafa aflað sér færni og reynslu í viðkomandi fagi. Nemendur sýna þá fram á kunnáttu með sýnishornum af vinnu sinni, auk skriflegra og munnlegra verkefna. Boðið er upp á undirbúningsnám fyrir nemendur sem fara þá leið. Með stöðuprófum og námsmati má, auk grunnprófs, ljúka sérfagsprófi þar sem krafist er dýpri þekkingar á einhverju sérsviði fagsins.

Að loknu verklegu framhaldsskólanámi er hægt að sækja um nám á háskólastigi, ýmist verklegt eða bóklegt.

Sótt er um inngöngu í verklegt nám gegnum sameiginlegt umsóknakerfi á vefsvæðinu Opintopolku.fi.

Nánari upplýsingar um verkmenntun eru á heimasíðu Fræðsluráðs.

Vantar þig nánari upplýsingar?

Spurningar um flutning, vinnu og nám á Norðurlöndunum má senda með því að fylla út rafrænt eyðublað. Spurningum er svarað af starfsfólki upplýsingaþjónustunnar Halló Norðurlönd.

Menntun á Norðurlöndum

Nám í Danmörku

Nám í Finnlandi

Nám í Færeyjum

Nám á Íslandi

Nám í Noregi

Nám í Svíþjóð

Nám á Álandseyjum

Meira um Finnland

Flutningar til eða frá Finnlandi

Búseta og dvöl í Finnlandi

Börn og fjölskylda í Finnlandi

Vinna í Finnlandi

Nám í Finnlandi