Skattar á Íslandi

Algengustu skattar á Íslandi eru útsvar sem rennur til sveitarfélaganna og tekjuskattur og eignarskattur sem renna til ríkisins.

Með örfáum undantekningum greiða allir sem hafa tekjur á Íslandi útsvar og tekjuskatt. Auk þess er greiddur skattur af fjármagnstekjum sem flokkast meðal annars undir vaxtatekjur, arð, söluhagnað og leigutekjur.

Auðlegðarskattur og erfðafjársskattur eru einnig lögbundnir á Íslandi sem og skattur af sumum happadrættisvinningum.

Persónuafsláttur

Til að tryggja skattgreiðendum lágmarkstekjur er veittur skattaafsláttur sem kallast persónuafsláttur og kemur á móti áðurnefndum sköttunum.

Persónuafslátturinn er viss upphæð sem ákveðin er fyrir eitt ár í einu. Ónýttur persónuafsláttur færist milli mánaða. Ónýttur og uppsafnaður persónuafsláttur sem ekki er nýttur innan skattaársins fellur niður við upphaf nýs skattaárs. Hjón og fólk í sambúð geta flutt persónuafslátt sín á milli og undir vissum kringumstæðum er mögulegt að nýta þann afslátt sem maki hefur ekki nýtt sér.

Norrænir ríkisborgarar sem starfa tímabundið á Íslandi fá persónuafslátt fyrir þá daga sem þeir dvelja á landinu.

Skattkort

Sótt er um skattkort á skrifstofum Ríkisskattstjóra. Skattkort veitir rétt til persónuafsláttar. Þeir sem náð hafa 16 ára aldri og þeir sem flytja lögheimili sitt til Íslands fá sent skattkort heim.

Skattkortið ber að afhenda vinnuveitanda áður en fyrsta launagreiðslan fer fram til þess að hægt sé að reikna út staðgreiðslu skatta með tilliti til persónuafsláttar.

Sé unnið fyrir fleiri en einn laungreiðanda er möguleiki á að nýta persónuafsláttinn á fleiri en einum stað og er skattkortinu þá skipt upp eftir því sem við á.

Skattframtal

Á skattframtali koma fram upplýsingar um tekjur, skuldir og eignir frá fyrra ári en því ber að skila til skattstjóra einu sinni á ári, í marsmánuði.

Í ágústmánuði ár hvert fá skattgreiðendur senda innheimtu- og álagningarseðli frá skattstjórum, ýmist á netinu eða í pósti, en þar koma fram upplýsingar um komandi skattauppgjör.

Hafi skattgreiðandi greitt of mikið í skatt fær viðkomandi mismuninn greiddan til baka en hafi skattgreiðandi greitt og lítið í skatt þarf hann að greiða mismuninn til baka til ríkisskattsjóra.

Tvísköttunarsamningur

Til að auðvelda og samhæfa álagningu skatta á Norðurlandabúa sem flytjast milli landanna, hafa ríkisstjórnir Norðurlandanna gert með sér samning til að komast hjá tvísköttun.

Frekari upplýsingar um skattamál á Íslandi má finna á íslensku á heimasíðu Ríkisskattstjóra. Á samnorrænu vefgáttinni Nordisk eTax má finna greinargóðar upplýsingar  um skattamál á Norðurlöndum og eins má finna tvísköttunarsamninginn í heild sinni. Upplýsingar á Nordisk eTax eru á mismunandi tungumálum; á íslensku, dönsku, norsku, sænsku, finnsku og ensku.

Ótakmörkuð skattskylda

Almenna reglan er sú að þeir sem heimiisfastir eru á Íslandi bera ótakmarkaða skattskyldu. Það á einnig við ef flutt er úr landi og heimilsfestin hefur verið felld niður, nema að viðkomandi geti sýnt fram á að hann sé skattskyldur í landinu sem flutt er til. Eins flokkast þeir sem dvelja á Íslandi í lengur en samtals 183 daga á tólf mánaða tímabili undir áðurnefnda ótakmarkaða skattskyldu og er þar með talin fjarvera frá Íslandi sökum orlofs og málum því tengdu. Það á jafnframt við um þá sem starfa á skipi sem skráð er á Íslandi eða sé starfað um borð í loftfari.

Tekið er tillit til tvísköttunarsamnings Norðurlanda þegar skattskylda er ákvörðuð á einstaklinga.

Takmörkuð skattskylda

Með takmarkaðri skattskyldu einstaklinga er átt við að þeim ber skylda til þess að greiða tekjuskatt af tekjum sem eiga uppruna sinn á Íslandi, og ekki er tekið tillit til tekna sem aflað er annars staðar en á Íslandi á sama almanaksári. Takmörkuð skattskylda nær til tekna sem flokkast gætu undir launað starf, lífeyrisgreiðslur, tekjur af atvinnurekstri eða eignatekjum og söluhagnaði af fasteignum.

Í áðurnefndum tvísköttunarsamningi er reynt að koma í veg fyrir tvísköttun á tekjum sem væru skattskyldar hér á Íslandi ef ekki væri fyrir samninginn.