Ef einstaklingur er launþegi og verður veikur

Vinnuveitandi greiðir sjúkradagpeninga fyrstu 21 dagana ef launþegi er fjarverandi vegna veikinda. Að þeim tíma loknum greiðir sveitarfélagið.

Sjúkradagpeningar frá vinnuveitanda

Vinnuveitandi greiðir sjúkradagpeninga vegna veikinda í 21 dag frá fyrsta veikindadegi og ef viðkomandi

• fær ekki full laun í veikindum
• hefur unnið minnst 74 tíma hjá vinnuveitanda síðustu 8 vikur fyrir veikindaorlofið

Sjúkradagpeningar frá sveitarfélaginu

Ef vinnuveitandi hefur greitt sjúkradagpeninga í 21 dag og starfsmaður er enn veikur, skal hann tilkynna veikindi til sveitarfélagsins minnst viku eftir að greiðslur frá vinnuveitanda stöðvast.

Sveitarfélagið greiðir sjúkradagpeninga ef viðkomandi

• hefur verið í starfi samfleitt 13 vikur áður en veikindi komu til og á þeim tíma starfað a.m.k. í 120 tíma en á ekki rétt á sjúkradagpeningum frá vinnuveitanda fyrir sama tímabil
• hefði átt rétt á atvinnuleysisbótum eða bótum sem koma í staðinn ef veikindi hefðu ekki komið til
• hefur lokið minnst 18 mánaða starfsnámi fyrir minna en mánuði síðan
• er nemi í launaðri starfsþjálfun sem eftirlit er með samkvæmt lögum
• er í sveigjanlegu starfi (fleksjob)

Viðtal vegna veikindafjarveru

Vinnuveitandi skal boða starfsmann í viðtal með til þess að skipuleggja hvernig hann getur haldið tengslum við vinnustað innan fjögurra vikna eftir að veikindaorlof hófst.

Ef veikindin eru langvarandi getur starfsmaður átt rétt á hlutastarfi eða því að sinna verkefnum sem löguð eru að þörfum hans.

Yfirlýsing um starfsgetu (mulighedserklæring)

Ef starfsmaður er fjarverandi frá vinnu vegna veikinda getur vinnuveitandi farið fram á að hann fylli út „yfirlýsingu um starfshæfni".

Hún er fyllt út af starfsmanni og vinnuveitanda til þess að finna út hvaða verkefni starfsmaðurinn getur leyst þrátt fyrir veikindi.

Þegar aðilarnir hafa fyllt út síðu 1 í yfirlýsingunni, skal starfsmaður fara með hana til heimilislæknisins sem gefur faglegt mat sitt á síðu 2.

Síðan skal yfirlýsingin send vinnuveitanda.

Engar reglur gilda um hvenær vinnuveitandi getur krafist yfirlýsingar um starfsgetu.

Nánar um yfirlýsingu um starfsgetu á vefsíðu vinnumarkaðsstofnunar: Arbejdsmarkedsstyrelsens netsted.

Ef einstaklingur er atvinnulaus og verður veikur

Sveitarfélagið greiðir sjúkradagpeninga ef einstaklingur er atvinnulaus og ef hann

• hefur verið á vinnumarkaði síðustu 13 vikur fyrir veikindaorlof og hefur á því tímabili unnið a.m.k. 120 tíma,
• er aðili að atvinnuleysistryggingasjóði og á rétt á bótum þaðan
• hefur lokið a.m.k. 18 mánaða menntun fyrir minna en mánuði síðan, eða
• er nemi í launaðri starfsþjálfun.

Langvarandi veikindi

Ef einstaklingur er veikur í meira en átta vikur, mun sveitarfélagið senda upplýsingaeyðublað sem viðkomandi verður að svara og senda til baka innan átta daga.

Síðan mun sveitarfélagið boða viðkomandi í viðtal eða hringja innan átta vikna eftir fyrsta veikindadag.

Markmiðið með viðtalinu er að viðkomandi fái aðstoð við að halda starfi sínu og tengslum við vinnumarkaðinn.

Sveitarfélagið skal, á fjögurra vikna til þriggja mánaða fresti, á meðan á veikindum stendur fylgjast með viðkomandi með það að markmiði að hjálpa honum að halda vinnunni.

Eftirlit ræðst af heilbrigðisástandi hvers og eins.

Sjúkradagpeningar fyrir sjálfstæða atvinnurekendur

Ef einstaklingur er sjálfstætt starfandi getur hann keypt tryggingu og þar með tryggt sér sjúkradagpeninga fyrstu tvær vikur veikindaorlofs.

Til þess að fá þessa tryggingu er skilyrði að fyrirtækið hafi tekjur.

Nánari upplýsingar um sjúkradagpeninga fyrir sjálfstæða atvinnurekendur fást hjá stjórnsýslu ríkisins (Statens Administration).

Hve lengi er hægt að fá sjúkradagpeninga?

Meginreglan er sú að hægt sé að fá sjúkradagpeninga í að hámarki 52 vikur á 18 mánaða tímabili.

Ef viðkomandi og sveitarfélagið hafa ekki ákveðið hvort hann eigi að fara í sveigjanlega vinnu eða eftirlaun fyrir venjulegan eftirlaunaaldur (førtidspension) getur hann fengið framlengingu á sjúkradagpeningagreiðslum.

Réttur til sjúkradagpeninga fellur brott

• ef viðkomandi neitar að leggjast á sjúkrahús þrátt fyrir hvatningu læknis, neitar að taka við nauðsynlegri heilbrigðisþjónustu eða ef viðkomandi neitar að taka þátt í nauðsynlegri þjálfun til þess að endurheimta starfshæfni.
• ef viðkomandi dregur batann á langinn
• ef viðkomandi neitar að taka þátt í eftirliti og úrræðum sveitarfélagsins án góðrar ástæðu
• ef viðkomandi sinnir ekki tilkynningaskyldu eða getur ekki gert grein fyrir fjarveru

Nánari upplýsingar um sjúkradagpeninga á vefsíðunni: borger.dk.