Upplýsingar fyrir vinnuveitendur og/eða þá sem reka eigið fyrirtæki
Vinnuveitendur og þeir sem reka eigið fyrirtæki verða að fara eftir ákveðnum reglum þegar þeir ráða starfsfólk frá öðru ríki. Að neðan eru nokkrar grundvallarreglur.
Starfsfólk frá ESB- og EES-ríkjum
Persónuskilríki
Starfsfólk þarf að geta framvísað gildu vegabréfi eða persónuskilríkjum þar sem ríkisfangs er getið.
Ráðningarsamningur/ráðningarkjör
Gera skal skriflegan ráðningarsamning þegar starfsmaður er ráðinn. Í samningnum skulu vera upplýsingar m.a. um form ráðningar, upphafsdag, verkefni/stöðu, laun, vinnutíma, orlof og hvaða kjarasamningi skal fylgt.
Sömu reglur skulu gilda um starfsfólk frá ESB/EES-ríkjum og fyrir sænskt starfsfólk, samkvæmt jafnræðisreglu ESB. Sú regla bannar mismunun vegna þjóðernis hvað varðar ráðningu, laun og önnur starfs- og ráðningarkjör.
Vinnumarkaðstryggingar
Samkvæmt kjarasamningum er vinnuveitanda skylt að vera með ákveðnar vinnumarkaðstryggingar fyrir starfsmenn. Nánari upplýsingar eru á vefsíðunni Svenskt Näringslivs försäkringssida.
Almannatryggingar
ESB/EES-borgarar eiga rétt á almannatryggingum í því landi sem viðkomandi starfar í og greiðir almannatryggingagjald. Það á einnig við þó starfsmaðurinn sé búsettur í öðru ESB/EES-ríki. Fjölskyldumeðlimir starfsmanns, sem ekki stunda vinnu, eru einnig tryggðir í því landi sem viðkomandi starfar í. Tryggingin gildir frá fyrsta starfsdegi.
Skattareglur
Meginreglan í skattalöggjöfinni er að starfsmaður greiðir skatt í því landi sem hann starfar í. Ákveðnar undantekningar finnast innan ESB. Skatteverket veitir nánari upplýsingar.
Starfsmenn frá löndum utan ESB/EES
Ríkisborgarar landa utan ESB/EES sem vilja starfa í Svíþjóð verða að hafa atvinnuleyfi. Atvinnuleyfið skal vera greinlega áritað í vegabréf áður en viðkomandi kemur til Svíþjóðar. Arbetsförmedlingen veitir nánari upplýsingar.
