Á Eystrasaltssvæðinu eru nú þegar fjölmargir aðilar sem vinna saman á margvíslegan hátt að málefnum sem skipta svæðið og íbúa þess miklu máli. Ríkisstjórnir landanna á svæðinu starfa saman og einnig þingmenn, stjórnvöld, sveitarfélög, atvinnulíf, frjáls félagasamtök og aðrir.

Stækkandi samband

Samstarfið á Eystrasaltssvæðinu eykst á allan hátt. stjórnmálalega, menningarlega og félagslega. Einstaklingar og fyrirtæki tengjast æ sterkari böndum. Múrarnir milli landanna og leifar úreltra stjórnkerfa eru nú nær horfnir. Það verður sífellt eðlilegra og sjálfsagðara að ferðast yfir landamæri, hvort sem um ferðalög, nám eða vinnu er að ræða. Eðlilega er enn langt þangað til hægt er að tala um Eystrasaltssvæðið sem samþætt svæði á allan hátt, en stefnan er mörkuð og vinnan er hafin. Það er mikilvægt að öll lönd á svæðinu geti tekið þátt í þessu starfi á jafnréttisgrundvelli.

Árangur

Mörg góð dæmi eru til um að hugmyndum sé breytt í veruleika. Umhverfissamstarfið innan ramma norðlægu víddarinnar stendur fyrir fjölmörgum umhverfisverkefnum sem eru þýðingarmikil fyrir lífríki sjávar í Eystrasaltinu Þau eru meðal annars styrkt af Norræna fjárfestingabankanum (NIB [en]). Eitt af þeim verkefnum sem vert er að minnast á er skólphreinsistöðin í sunnaverðri Pétursborg sem var tekin í notkun árið 2005.

Eftir nokkra byrjunarörðugleika samþykktu ríkisstjórnirnar innan ramma Helsinkinefndarinnar(HELCOM [en]) tímamóta aðgerðaráætlun „Baltic Sea Action Plan” (BSAP)árið 2007. Hún felur í sér umfangsmiklar skuldbindingar og framkvæmdaáætlanir, meðal annars að minnka til muna losun fosfórs og köfnunarefnis. Þær fjármálastofnanir sem starfa á svæðinu, þar á meðal NIB og Norræna umhverfisfjármögnunarfélagið (NEFCO [en]), hafa fjármagn sem hægt er að nýta til að framkvæma aðgerðaáætlun HELCOM.

Eitt af stóru verkefnum aðila á Eystrasaltssvæðinu er að þróa raunveruleg fjármögnunarhæf verkefni, sem geta gert markmið framkvæmdaáætlunarinnar að veruleika með því að tengja þau því fjármagni sem fjármálastofnanirnar hafa yfir að ráða.

Þessar aðgerðir geta haft mikil áhrif á þróun heilbrigðis og velferðar á Eystrasaltssvæðinu. Þess vegna verða ríkisstjórnirnar að standa við skuldbindingar, til dæmis í framkvæmdaáætlun HELCOM. Það er síðan verkefni þingmanna að fylgjast með og efla þróunina og krefjast pólitískrar ábyrgðar. Það geta þeir gert með þátttöku í þjóðþingunum, í Norðurlandaráði og Eystrasaltsráðstefnunni (BSPC [en]).

Þingmannasamstarf Eystrasaltssvæðisins

Norðurlandaráð hefur lengi haft málefni Eystrasaltsins á dagskrá sinni. Ráðið var haft að fyrirmynd þegar þjóðþing Eystrasaltsríkjanna stofnuðu Eystrasaltsráðið árið 1991.

Þingmannasamstarf Eystrasaltssvæðisins, BSPC, var stofnað árið 1991 og í því taka þátt fulltrúar allra þjóðþinga og svæðisbundinna þinga á Eystrasaltssvæðinu og Evrópuþinginu. Norðurlandaráð hefur sterka stöðu í BSPC. Þar sem bæði Rússland, Noregur og Ísland taka þátt, er BSPC pólitískur vettvangur þar sem þingmenn frá löndum innan og utan ESB geta hist til að mynda sér skoðun, beita pólitískum þrýstingi í málum sem eru svæðinu mikilvæg ásamt því að taka þátt í ýmiskonar pólitísku starfi.