Norrænt samstarf um landbúnað
Sjálfbær þróun á Norðurlöndum er grundvallaratriði í norrænu samstarfi um landbúnað. Reynt er að ná aukinni samþættingu og áhrifum á alþjóðavettvangi með pólitískum umræðum og eftirfylgni við samstarfsverkefni þegar við leggjum áherslu á málefni sem eru miklvæg í norrænu samhengi.
- Ljósmyndari
- Johannes Jansson/norden.org
Einkenni landbúnaðar á Norðurlöndum er mikill munur á loftslagi og landfræðilegum aðstæðum, en jafnframt stendur greinin andspænis svipuðum vandamálum.
Hnattvæðing og aukin samkeppni setja atvinnugreinina í þá stöðu að þurfa sífellt að endurnýja sig og hugsa á nýjan hátt. Umhverfisvandamál og loftslagsbreytingar auka einnig þörfina fyrir eflingu sjálfbærrar þróunar á sviði landbúnaðar.
Hvers vegna samstarf um landbúnað?
Markmið norræns samstarfs á sviði landbúnaðar og skógvinnslu er að stuðla að raunverulegri sjálfbærri þróun á sviði landbúnaðar.
Í samstarfinu er lögð áhersla á ýmis atriði sem öll stuðla að því að efla þróun landbúnaðarframleiðslu undir áhrifum frá hnattvæðingu, umhverfismálum og loftslagsbreytingum:
- umhverfismál og sjálfbærar framleiðsluaðstæður
- afleiðingar loftslagsbreytinga fyrir landbúnaðarframleiðslu
- notkun og sjálfbær nýting erfðaauðlinda
- sjálfbær lífræn orka
- þróun landsvæða
- rannsóknir á sviði landbúnaðar
- Ný norræn matargerðarlist
Verkefni
Undanfarin ár hefur átt sér stað mikil þróun á sviði matvælaframleiðslu.
Aukin áhersla er á fjölbreyttari landbúnaðar- og matvælaframleiðslu. Ástæðurnar eru breyttar óskir neytenda, alþjóðlegar samkeppnisaðstæður, áhugi framleiðenda á þróun framleiðslunnar, líffræðileg fjölbreytni og önnur atriði.
Norrænt samstarf leitast við að styðja við þessa þróun á margan hátt.
- Norræna erfðaauðlindastofnunin
Norðurlöndin eiga með sér samstarf um erfðaauðlindir Norræna ráðherranefndin um fiskveiðar, landbúnað og skógrækt og matvæli (MR-FJLS) samþykkti árið 2007 að setja á fót sameiginlega stofnun með það að markmiði að efla rannsóknir á geymslu og sjálfbærri notkun erfðaauðlinda úr plöntum, húsdýrum og trjám.
Stofnunin varð til við sameiningu þriggja stofnana og hlaut heitið Norræna erfðaauðlindastofnunin - NordGen.
NordGen fæst við margskonar verkefni og gerir tillögur að aðgerðum í tengslum við loftlagsbreytingar og tækifæri til að auka fjölbreytni í landbúnaði og matvælaframleiðslu.
- Ný norræn matargerðarlist
Þróunin hefur einnig fengið mikla athygli vegna áætlunarinnar Nýrrar norrænnar matargerðarlistar sem á sinn hátt stuðlar að aukinni fjölbreytni í framleiðslunni og einnig fyrir neyterndur.
Ný norræn matargerðarlist hefur mikil áhrif á nýsköpun á sviði landbúnaðar og stuðlar þar með að auknum samkeppniskrafti atvinnugreinarinnar.
