Bifreið í Svíþjóð

Bil i Sverige
Lestu um reglur sem gilda um innflutning á bílum og notkun erlendra farartækja í Svíþjóð.

Meginreglan er sú að ökutæki skuli vera skráð í búsetulandi eiganda. Ef þú býrð í Svíþjóð á farartæki þitt einnig að vera skráð þar í landi.

Öll ökutæki sem flutt eru til Svíþjóðar og notuð þar verður að upprunaskoða áður en þau eru skráð. Sótt er um upprunaskoðun á bifreiðum hjá Transportstyrelsen.

Þegar upprunaskoðun hefur verið gerð og samþykkt skal hafa samband við bifreiðaskoðunina til að fá skráningarskoðun.

Bifreiðaeftirlitið hefur gefið út gátlista um allt ferlið við innflutning á ökutæki. Þar eru útskýringar á því hvað gera skal og í hvaða röð, frá því að komið er með bifreið að sænsku landamærunum og þar til nota má bifreiðina í Svíþjóð. Þar eru einnig upplýsingar um tolla,skatta, tryggingar, upprunaskoðun, skráningarskoðun og skráningarnúmer.

Tollur og skattur

Innflutningur bifreiða frá Danmörku og Finnlandi er ekki tollskyldur, þar sem öll ríkin eiga aðild að ESB. Hafa skal samband við skattayfirvöld (Skatteverket), til að fá frekari upplýsingar um skatta og virðisaukaskatt.

Athugið að ef bifreið er flutt til Svíþjóðar frá Íslandi eða Noregi er hún tollskyld. Því þarf að hafa samband við tollstjóra.

Einstaklingar sem flytja með sér bifreið frá Íslandi eða Noregi þegar þeir flytja til Svíþjóðar geta sóttt um undanþágu frá tollum. Undanþágan fer meðal annars eftir því hvort viðkomandi er innflytjandi, hvort hann er að flytja tilbaka til Svíþjóðar og hve lengi hann hefur átt bifreiðina.

Bifreiðatryggingar

Öll ökutæki eiga að vera ábyrgðartryggð. Frekari upplýsingar um ábyrgðartryggingu, hvenær tryggja skal og hvað gerist ef bifreið er ótryggð fást á vef bifreiðaeftirlitsins (Transportstyrelsen).

Akstur erlendra ökutækja í Svíþjóð

Ríkisborgari annars norræns ríkis sem hefur tímabundna búsetu í Svíþjóð má að hámarki aka á erlendum skráningarmerkjum (númeraplötum) í landinu í eitt ár.

Ferðamenn í Svíþjóð ættu að hafa samband við eigið tryggingafélag til að fá frekari upplýsingar.

Umferðarreglur

Þegar ekið er í Svíþjóð skal fara að sænskum umferðarlögum og hraðatakmörkunum. Nánari upplýsingar um þær reglur sem gilda í Svíþjóð má nálgast á neðangreindum tenglum.

Sænsk ökutæki erlendis

Reglur norræns ríkis sem flutt er til segja til um hversu lengi má aka bifreið sem er skráð í Svíþjóð í viðkomandi landi.

Danmörk

Reglur um skráningu bifreiða í Danmörku eru mismunandi og fara eftir því hvort viðkomandi ferðast yfir sundið til vinnu, dvelur tímabundið í Danmörku eða hefur fasta búsetu í landinu.

Skýr takmörk eru fyrir því hve mikið, og með hvaða skilyrðum, má nota bifreið sem skráð er í Svíþjóð í Danmörku, ef eigandinn er með lögheimili í Danmörku.

Sérstakt samþykki danskra skattayfirvalda þarf til að mega nota bifreiðina í Danmörku. Á eyðublaði skattayfirvalda (blanket 21059) skal sækja um leyfi til að aka bifreið frá landamærum að dönsku lögheimili. Sé bifreið sem er skráð í Svíþjóð ekið í Danmörku án þessa leyfis má eiga von á sekt.

Hafa skal samband við skattayfirvöld og biðja um skráningardeild ökutækja (Centralregisteret for motorkøretøjer) til að fá frekari upplýsingar um reglur varðandi notkun ökutækja sem skráð eru erlendis í Danmörku.

Samband við yfirvöld
Spurning til Info Norden

Ef þú ert með spurningu skaltu fylla út eyðublaðið hérna:

ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.

Info Norden er upplýsingaþjónusta Norrænu ráðherranefndarinnar. Við gefum upplýsingar til fólks sem vill flytja, vinna, stunda nám, leita styrkjum eða hefja rekstur í öðru norrænu landi.
Leitaðu að skrifstofu Info Norden hérna