Ferðast með gæludýr til Noregs

Reise med kjæledyr til Norge
Um innflutning á dýrum í fríum eða vegna búferlaflutninga til og frá Noregi.

Ef þú ert á heimleið til Noregs eftir frí í útlöndum fær gæludýrið þitt sams konar meðferð og ef þú værir að flytja það inn til Noregs frá landinu sem þið eruð að koma frá. Mikilvægt er að skipuleggja ferðalagið tímanlega og kynna sér vandlega reglur sem gilda um áfangastaðinn. Örmerking gæludýrsins, bólusetning gegn hundaæði og ormahreinsun eru meðal þeirra atriða sem krafist er þegar þú snýrð aftur heim til Noregs með dýrið. Hér á eftir geturðu lesið um reglur sem gilda um innflutning á dýrum.

Mattilsynet sér um framkvæmd laganna um innflutning dýra til Noregs.

    Ferðast með hunda, ketti og frettur frá ESB/EES-svæðinu til Noregs

    Leyfilegt er að ferðast með hunda, ketti og frettur til Noregs að uppfylltum eftirfarandi skilyrðum:

    • Hundar, kettir og frettur verða að vera eldri en þriggja mánaða við komuna til landsins vegna þess að krafst er bólusetningar gegn hundaæði. Undanþegnir eru hundar, kettir og frettur sem hafa dvalið löglega í Svíþjóð. Þá þurfa dýrin ekki bólusetningu gegn hundaæði og mega vera yngri en þriggja mánaða. Öll dýr skulu vera örmerkt og með viðurkennt ESB-vegabréf fyrir gæludýr.
    • Allir hundar sem teknir eru með til Noregs þurfa að hafa fengið meðferð við dvergbandormi úr refum. Krafan um ormahreinsun á hvorki við um ketti né frettur, heldur ekki um hunda sem koma beint frá Finnlandi, Möltu, Bretlandi eða Írlandi. Dýralæknir skal annast meðferðina eigi síðar en 24 klukkustundum eða fyrr en 120 klukkustundum fyrir komuna til Noregs. Annar möguleiki er að hundurinn fái meðferð að minnsta kosti tvisvar með að hámarki 28 daga millibili áður en hann kemur til Noregs í fyrsta sinn. Eftir það þarf hundurinn að fá meðferð á að lágmarki 28 daga fresti. Sá kostur hentar hundaeigendum sem eru oft á ferðinni.
    • Dýr sem á að taka með til Noregs verða að vera bólusett gegn hundaæði. Undanþegnir eru kettir, hundar og frettur frá Svíþjóð sem þarf ekki að bólusetja gegn hundaæði. Skilyrði er að dýralæknir sjái um bólusetninguna og ekki fyrr en dýrið hefur náð tólf vikna aldri. Þegar dýrið er bólusett í fyrsta sinn gegn hundaæði þarf að líða 21 dagur þar til hún telst gild. Seinni bólusetningar teljast gildar frá þeim degi sem bólusett er að því tilskyldu að fyrri bólusetning hafi ekki verið fallin úr gildi. Krafan um bólusetningu gegn hundaæði á einnig við um komu frá öðrum löndum en Svíþjóð sem eru laus við hundaæði.
    • Þegar gæludýr eru tekin með í ferðalag frá ESB- og EES-löndum ber að sýna tollgæslunni dýrin og öll nauðsynleg gögn að fyrra bragði. Þá er valið rauða hliðið í tolleftirlitinu. Þegar ferðast er til Noregs frá Svíþjóð þarf ekki að sýna dýrið eða gögnin ef dýrið hefur dvalið löglega í Svíþjóð og uppfyllir allar kröfur við komuna.
    • Athugið að bann gildir um innflutning á svonefndum „bönnuðum hundategundum“.
    • Ef þú ferðast með fleiri en fimm dýr eða ef þú tekur dýrin með þér til að selja þau eða gefa skaltu kynna þér reglur á vefsíðum Mattilsyn um innflutning í söluskyni. Ef þú hyggst taka með þér fleiri en fimm dýr frá EES- og ESB-löndum til að taka þátt í keppnum og þú ert með gögn sem staðfesta það, þurfa dýrin að uppfylla tilteknar kröfur vegna innflutnings á fleiri en fimm dýrum til sýninga eða annarra viðburða.
    Ferðast með hunda, ketti og frettur frá löndum utan ESB/EES-svæðisins til Noregs

    Reglur um innflutning á hundum, köttum og frettum frá löndum utan ESB/EES-svæðisins fara eftir því hvort umrædd lönd eru á skrá eða ekki. Fyrir utan kröfur um meðferð og staðfestingarskjöl vegna innflutnings á gæludýrum eru gerðar sérstakar kröfur vegna ferða yfir landamæri, um innflutningsstaði og tilkynningar til viðeigandi eftirlitsyfirvalda.

    Ferðast til Noregs með búrfugla, kanínur og nagdýr

    Reglur um innflutning á búrfuglum, kanínum og nagdýrum eru nokkuð mismunandi eftir því hvaðan þú kemur með dýrin.

    Ferðast til Noregs með framandi dýr

    Sumar framandi dýrategundir er heimilt að taka með sér inn í landið. Aðrar dýrategundir er bannað að flytja inn.

    Innflutningur til og útflutningur frá Svalbarða

    Svalbarði er ekki aðili að EES-samningum, þess vegna gilda strangari reglur um flutning dýra eða dýraafurða frá Svalbarða til meginlandsins. Eins má geta þess að dæmi eru um hundaæði á Svalbarða en ekki á meginlandi Noregs.

    Leyfi þarf hjá Mattilsynet til að taka hund með sér til Svalbarða. Leyfi er veitt til eins árs í senn.

    Ekki er leyfilegt að taka ketti eða frettur með sér til Svalbarða. Ekki þarf leyfi til að taka með sér kanínur, hamstra, gælurottur, búrfugla og búrfiska til og frá Svalbarða.

    Samband við yfirvöld
    Spurning til Info Norden

    Ef þú ert með spurningu skaltu fylla út eyðublaðið hérna:

    ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.

    Info Norden er upplýsingaþjónusta Norrænu ráðherranefndarinnar. Við gefum upplýsingar til fólks sem vill flytja, vinna, stunda nám, leita styrkjum eða hefja rekstur í öðru norrænu landi.
    Leitaðu að skrifstofu Info Norden hérna