Flytja frá Danmörku til útlanda

Flytte fra Danmark til udlandet
Hér eru helsti atriði sem þú þarft að gæta að við undirbúning á flutningi þínum frá Danmörku til annars norræns lands.

Tilkynntu flutning hjá þjóðskrá

Áður en þú flytur úr landi þarftu að tilkynna flutninginn á skráningarskrifstofu (folkeregisteret) í því sveitarfélagi þar sem þú býrð. Allir sem flytja úr landi eiga að vera skráðir brottfluttir í þjóðskrá.

Þú þarft að tilkynna flutninginn til þjóðskrár eigi síðar en fimm dögum eftir flutninginn. Ef þú tilkynnir ekki flutninginn geturðu fengið sekt.

Skemmri dvöl en sex mánuðir

Ef þú dvelst skemur en í sex mánuði erlendis geturðu sótt um hjá þjóðskrá að halda lögheimili þínu í Danmörku.

Krafan er yfirleitt sú að þú hafir heimili þitt í Danmörku til umráða á öllu tímabilinu. Það hefurðu ekki ef þú hefur framleigt það, lánað eða leigt út.

Ef þú hefur ekki fullan aðgang að heimili þínu getur sveitarfélagið metið hvort þú getir haldið heimilisfanginu og lögheimili þínu í Danmörku.

Heima um helgar og í fríum

Ef þú dvelur lengur en sex mánuði erlendis vegna starfa þinna en ert á heimili þínu í Danmörku flestar helgar, frídaga og í leyfum, áttu einnig rétt á að halda lögheimilinu í Danmörku.

Sama á við um maka þinn og börn ef þau eru með þér í útlöndum.

Flutningur til annars norræns lands

Þegar þú flytur frá Danmörku til Finnlands, Færeyja, Íslands, Noregs eða Svíþjóðar þarftu að tilkynna flutninginn á skráningarskrifstofu í sveitarfélaginu þínu.

Þú þarft einnig að tilkynninga flutninginn í hinu norræna landinu á skráningarskrifstofu sveitarfélagsins áður en frestur til að tilkynna flutninginn í landinu rennur út.

Þú þarft að hafa með þér persónuskilríki, þar á meðal vottorð um ríkisfang (vegabréf) og gefa upp kennitölu og gamla heimilisfangið í Danmörku.

Skráningarskrifstofan í danska sveitarfélaginu sem þú fluttir úr getur ekki skráð ykkur brottflutt úr landi fyrr en henni hefur borist tilkynning um nýtt lögheimili ykkar frá skráningarskrifstofunni í nýja sveitarfélaginu.

Þegar þú flytur úr einu norrænu landi í annað gildir samningur Norðurlandanna um almannaskráningu. Samningurinn felur í sér að þú getur aðeins átt eitt lögheimili á Norðurlöndum.

    Tilkynntu flutninginn til póstþjónustunnar

    Þú þarft að tilkynna flutninginn til póstþjónustunnar. Það geturðu gert rafrænt með NemID-auðkenni á ePosthuset. Ef þú hefur ekki NemID eða getur af einhverjum ástæðum ekki notað ePosthuset er hægt að hafa samband við þjónustuver PostNord á netfanginu flyt@postnord.com.

      Skattyfirvöld

      Þú þarft að upplýsa skattyfirvöld um flutning þinn úr landi. Nánari upplýsingar er að finna á vef SKAT.

        Almannatryggingar og sjúkratryggingar

        Ef þú flytur til útlanda vegna starfa þinna og ert ekki lengur með heimilisfang í Danmörku ertu heldur ekki í danskri þjóðskrá.

        Samtímis fellur niður aðild þín að dönsku almannatryggingakerfi og þú þarft að skila sjúkratryggingaskírteininu þínu á skrifstofu sveitarfélagsins. Almannatryggingar gilda heldur ekki þegar þú dvelur í Danmörku í fríum.

        Danmörk hefur gert samning um almannatryggingar við hin Norðurlöndin, EES-löndin og nokkur önnur lönd.

          Atvinnuleysistryggingasjóðir og dagpeningar

          Ef þú flytur frá Danmörku til annars norræns lands geturðu tekið með þér áunninn bótarétt.

          Ef þú ert í dönskum atvinnuleysistryggingasjóði geturðu fært áunnin trygginga- og starfstímabil frá Danmörku yfir í atvinnuleysistryggingasjóð í hinu norræna landinu.

          Tryggingatímabil þitt í dönskum atvinnuleysistryggingasjóði er tekið með við mat á rétti þínum til bóta í hinu norræna landinu.

          Óskir þú eftir því að trygginga- og starfstímabil þitt verði tekið með í atvinnuleysistryggingasjóð í öðru EES-landi þarftu að hafa vottorð sem staðfestir það. Atvinnuleysistryggingasjóður gefur út vottorðið sem kallast PD U1. Þú fyllir út eyðublaðið EØS 4 þegar þú sækir um vottorðið.

            Bifreið

            Ef þú átt bíl þegar þú flytur úr landi geturðu oft fengið hluta danska skráningargjaldsins endurgreiddan. Nánari upplýsingar er að finna á vefsíðu SKAT.

              Nánari upplýsingar

              Spurning til Info Norden

              Ef þú ert með spurningu skaltu fylla út eyðublaðið hérna:

              ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.

              Info Norden er upplýsingaþjónusta Norrænu ráðherranefndarinnar. Við gefum upplýsingar til fólks sem vill flytja, vinna, stunda nám, leita styrkjum eða hefja rekstur í öðru norrænu landi.
              Leitaðu að skrifstofu Info Norden hérna