Tryggingar í Finnlandi

Vakuutukset Suomessa
Á þessari síðu eru upplýsingar um tryggingar í Finnlandi. Algengustu tryggingaformin eru heimilistrygging og umferðartrygging, auk valfrjálsra trygginga á borð við ferðatryggingu og slysatryggingu.

Auk finnskra almannatrygginga eru í boði ýmsar tryggingar á vegum einkarekinna tryggingafélaga. Slíkar tryggingar eru heimilistrygging og umferðartrygging, auk valfrjálsra trygginga á borð við bílatryggingu, sjúkdómatryggingu á vegum einkaaðila, slysatryggingu, líftryggingu og ferðatryggingu.

  • Heimilistrygging er oft skilyrði fyrir því að fá leigða íbúð.
  • Öllum eigendum vélknúinna ökutækja í Finnlandi er skylt að hafa svonefnda umferðartryggingu, en bifreiðartrygging (kaskótrygging) er valkvæð.
  • Tryggingafélögin selja ýmsar valfrjálsar sjúkratryggingar sem gera tryggðum einstaklingum kleift að sækja sér dýrari heilbrigðisþjónustu og -meðferðir en hið almenna lögbundna sjúkratryggingakerfi býður upp á.
  • Ferðatrygging á vegum tryggingafélags veitir aukið öryggi meðan dvalið er tímabundið erlendis.

Að auki er hægt að kaupa ýmsar slysa- og líftryggingar.

Fæst tryggingafélög í Finnlandi selja persónutryggingar þeim sem búa tímabundið í landinu. Yfirleitt er gerð krafa um að viðkomandi hafi fasta búsetu í Finnlandi eða eigi aðild að almannatryggingum í landinu. Heimilistrygging er þó yfirleitt í boði fyrir fólk með tímabundna dvöl í Finnlandi. Ekki er kveðið á um skilmála tryggingafélaga í lögum, heldur sjá félögin sjálf um að útfæra þá. Nánari upplýsingar veita tryggingafélögin.

Á meðal tryggingafélaga sem starfa í Finnlandi eru Fennia, If, LähiTapiola, Pohjantähti, Pohjola Vakuutus, POP Vakuutus og Turva.

Nánari upplýsingar

Sjúkratryggingar á vegum einkaaðila

Auk sjúkratrygginga almannatryggingastofnunar bjóða ýmis tryggingafélög upp á sjúkratryggingar sem gera tryggðum einstaklingum kleift að sækja sér dýrari heilbrigðisþjónustu og -meðferðir en almenna kerfið býður upp á. Þú þarft alltaf að tryggja þig í því landi þar sem þú hefur almannatryggingar. Viljir þú auka öryggi þitt meðan dvalið er tímabundið erlendis með því að tryggja þig á vegum einkaaðila er ferðatrygging eini kosturinn sem býðst.

Spurning til Info Norden

Ef þú ert með spurningu eða ef þú hefur rekist á hindrun í norrænu landi skaltu fylla út eyðublað okkar.

ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.

Info Norden er upplýsingaþjónusta Norrænu ráðherranefndarinnar. Við gefum upplýsingar til fólks sem vill flytja, vinna, stunda nám, leita styrkjum eða hefja rekstur í öðru norrænu landi.
Leitaðu að skrifstofu Info Norden hérna