Kosningaréttur í Finnlandi

Ríkisborgarar annarra norrænna landa hafa, að tilteknum skilyrðum uppfylltum, kosningarétt og kjörgengi í finnskum sveitarstjórnarkosningum og í ráðgefandi íbúakosningum um málefni sveitarfélaga, og borgarar norrænna aðildarríkja Evrópusambandsins mega kjósa í kosningum til Evrópuþingsins. Í finnskum þing- og forsetakosningum og almennum þjóðaratkvæðagreiðslum hafa aðeins finnskir ríkisborgarar kosningarétt.

Nánari upplýsingar um kosningar eru á kosningasíðum finnska dómsmálaráðuneytisins.

Sveitarstjórnarkosningar

Borgarar Finnlands og annarra Evrópusambandslanda, auk Íslands og Noregs, hafa kosningarétt til sveitarstjórna í Finnlandi ef þeir hafa náð 18 ára aldri á kjördegi og haft búsetu í sveitarfélaginu í að minnsta kosti 51 dag fram að kjördegi.

Auk þess hafa kosningarétt ríkisborgarar annarra landa sem hafa náð 18 ára aldri á kjördegi og búið í sveitarfélaginu í að minnsta kosti 51 dag fram að kjördegi og sem hafa haft fasta búsetu í Finnlandi í að minnsta kosti tvö ár samfleytt.

Íbúar sveitarfélags hafa kjörgengi í sveitarstjórnarkosningum ef þeir hafa kosningarétt í sömu kosningum og eru sjálfráða.

Sveitarstjórnarkosningar fara fram á fjögurra ára fresti.

Kosningar til Evrópuþingsins

Allir finnskir ríkisborgarar sem náð hafa 18 ára aldri á kjördag mega kjósa til Evrópuþingsins í Finnlandi, óháð búsetustað.

Það mega einnig borgarar annarra aðildarríkja Evrópusambandsins sem náð hafa 18 ára aldri á kjördag og átt búsetu í Finnlandi í minnst 51 dag fram að kjördegi. Til að virkja kosningaréttinn þarf þó að skrá sig á kjörskrá í Finnlandi. Ganga þarf frá skráningunni á skráningarskrifstofu síns búsetusveitarfélags (Maistraatti) minnst 80 dögum fyrir kjördag. Hægt er að skrá sig með því að skila inn eyðublaði frá finnsku þjóðskránni.

Kosningaréttur til Evrópuþingskosninga felur aðeins í sér rétt til að kjósa í einu aðildarríki Evrópusambandsins, annað hvort uppruna- eða búsetulandi.

Finnskur ríkisborgari sem hefur skráð sig tímanlega á kjörskrá annars aðildarríkis Evrópusambandsins vegna Evrópuþingskosninga hefur ekki kosningarétt í sömu Evrópuþingskosningum í Finnlandi.

Kosningar til Evrópuþingsins fara fram á fimm ára fresti.

Þingkosningar

Kosningarétt í finnskum þingkosningum hafa allir finnskir ríkisborgarar sem náð hafa 18 ára aldri á kjördag, óháð búsetustað. Allir finnskir ríkisborgarar sem búsettir eru í öðrum löndum hafa kosningarétt í finnskum þingkosningum.

Kjörskrá hverju sinni er byggð á upplýsingum sem fengnar eru úr þjóðskrá 51 degi fyrir kosningarnar. Því hafa finnskir ríkisborgarar aðeins kosningarétt í þingkosningum ef ríkisfang þeirra er skráð áður en kjörskrá er tekin saman.

Kjörgengi í finnskum þingkosningum hefur allt fólk sem hefur kosningarétt og er sjálfráða, að frátöldum atvinnuhermönnum og þeim sem gegna tilteknum háttsettum embættum.

Þingkosningar fara fram á fjögurra ára fresti.

Forsetakosningar

Kosningarétt í finnskum forsetakosningum hafa allir finnskir ríkisborgarar sem náð hafa 18 ára aldri á kjördag, óháð búsetustað. Kjörskrá hverju sinni er byggð á upplýsingum sem fengnar eru úr þjóðskrá 51 degi fyrir kosningarnar. Því hafa finnskir ríkisborgarar aðeins kosningarétt í forsetakosningum ef ríkisfang þeirra er skráð áður en kjörskrá er tekin saman.

Forseti finnska lýðveldisins þarf að vera finnskur ríkisborgari og fæddur í Finnlandi.

Forsetakosningar fara fram á sex ára fresti.

Þjóðaratkvæðagreiðslur og íbúakosningar

Um kosningarétt í ráðgefandi íbúakosningum sveitarfélaga gilda sömu reglur og um kosningarétt í sveitarstjórnarkosningum.

Um kosningarétt í ráðgefandi þjóðaratkvæðagreiðslum gilda sömu reglur og um kosningarétt í þingkosningum. Þegar þetta er ritað hefur tvisvar verið efnt til þjóðaratkvæðagreiðslu í Finnlandi: um afnám áfengisbanns árið 1931 og um inngöngu í Evrópusambandið 1994.

Nánari upplýsingar eru á kosningasíðum finnska dómsmálaráðuneytisins.