Um norrænt samstarf á sviði dómsmála

Það er sameiginleg áskorun norrænu landanna að berjast gegn og koma í veg fyrir þá alvarlegu glæpastarfsemi sem fer fram þvert á landamæri og notfærir sér hina miklu samþættingu og gegnsæi sem ríkir á Norðurlöndum. Þetta á við um mansal, eiturlyfjasölu og ofbeldi sem veldur miklum skaða í samfélaginu Þetta á líka við um netglæpi, svo sem kynferðislegt ofbeldi gagnvart börnum. Aukið samstarf lögreglu norrænu landanna er ein af mörgum sameiginlegum aðgerðum sem ætlað er að koma í veg fyrir þessa þróun. Það er einnig sameiginleg áskorun nokkurra Norðurlandanna að taka á glæpum sem spretta út frá öfgahyggju og ofbeldisfullu ofstæki.

Á sviði dómsmála er einnig fylgst með þvi hvernig stafræn þróun hefur áhrif á opinbera geirann og réttarkerfið, bæði frá sjónarhóli stjórnsýslunnar og þegar litið er til réttaröryggis borgara og fyrirtækja.

Fjölskyldutengsl eiga engin landamæri á Norðurlöndum þar sem einstaklingar geta valið hvar þeir vilja eiga heima og starfa. Á sviði dómsmála er stöðugt samstarf á sviði fjölskylduréttar þar sem löndin miðla reynslu og ræða vandamál sem meðal annars tengjast fjölskyldum sem flytja milli norrænu landanna.

Norræna ráðherranefndin um dómsmál (MR-JUST)

Norrænu dómsmálaráðherrarnir, Norræna ráðherranefndin um dómsmál (MR-JUST), kemur saman einu sinni á ári. Fundur dómsmálaráðherranna er undirbúinn af embættismannanefnd sem skipuð er æðstu embættismönnum norrænu dómsmálaráðuneytanna. Embættismannanefndin (EK-JUST) ber ábyrgð á undirbúningi fundanna og framkvæmd og eftirfylgni með þeim ákvörðunum sem ráðherrarnir taka. Embættismannanefndin kemur yfirleitt saman þrisvar á ári.

Norrænt-baltneskt samstarf

Svið dómsmála tekur einnig þátt í norrænu-baltnesku samstarfi. Annað hvert ár er haldinn norrænn-baltneskur fundur dómsmálaráðherra þar sem ráðherrarnir ræða málefni á sviði dómsmála sem eru brýn á Norðurlöndum og í Eystrasaltsríkjunum. Norrænn-baltneskur vinnuhópur embættismanna frá norrænu ríkjunum og Eystrasaltsríkjunum undirbýr þessa fundi og kemur saman tvisvar á ári.

Verkefnastyrkir

Svið dómsmála ræður yfir fjármagni og getur ákveðið að styðja verkefni sem stuðla að norrænu samstarfi innan ramma þeirra sviða sem svið dómamála ber ábyrgð á og fela í sér norrænan virðisauka. Hluti þessa fjármagns getur einnig runnið til norræns-baltnesks samstarfs.

Framkvæmdaáætlunin lýsir því hvernig Norræna ráðherranefndin mun vinna að því að uppfylla markmið framtíðarsýnarinnar með röð verkefna sem tengjast þremur stefnumarkandi áherslum: Græn Norðurlönd, samkeppnishæf Norðurlönd og félagslega sjálfbær Norðurlönd. Tólf markmið hafa verið sett fyrir þessar stefnumarkandi áherslur. Stefnumarkandi áherslurnar og markmiðin munu vísa veginn í starfi Norrænu ráðherranefndarinnar næstu fjögur árin. Framkvæmdaáætlunin er í tólf hlutum og fjallar hver þeirra um eitt markmið.