2018 Auður Ava Ólafsdóttir, Íslandi: Ör

Vinder af Nordisk Råds litteraturpris 2018

Bókmenntaverðlaun Norðurlandaráðs 2018 hlýtur skáldsagan Ör eftir Auði Övu Ólafsdóttur.

Photographer
Johannes Jansson
Ör eftir Auði Övu Ólafsdóttur frá Íslandi hlýtur bókmenntaverðlaun Norðurlandaráðs 2018.

Þetta var tilkynnt rétt í þessu á verðlaunahátíð Norðurlandaráðs í Óperunni í Ósló. Auður Ava hlýtur verðlaunin fyrir verk sem einkennist af útsmognum húmor og leiftrandi fjörugu tungumáli en spyr jafnframt áleitinna spurninga um lífið og dauðann.

Rökstuðningur dómnefndar

„Ég er að skrifa gegn myrkrinu í heiminum,“ segir Auður Ava Ólafsdóttir, handhafi bókmenntaverðlauna Norðurlandaráðs 2018. Í Ör kynnumst við miðaldra karlmanni sem ferðast til stríðshrjáðs Evrópulands í þeim tilgangi að fyrirfara sér, með verkfærakassa í farteskinu. Meðan á ferðinni stendur rennur upp fyrir honum að allir eiga sér verkfærakassa og geta valið hvernig þeir beita verkfærunum. Ör er lítil bók með stórt hjarta. Hún er full af útsmognum húmor og leiftrandi fjörugu tungumáli og spyr jafnframt áleitinna spurninga um lífið og dauðann, um einstaklinginn gegn heildinni, um forréttindi fólks, réttindi þess og skyldur í heiminum. Ekki síst þá skyldu að leyfa mennskunni að storka myrkrinu.