Norrænt samstarf hjálpar konum af erlendum uppruna að fóta sig á vinnumarkaði
„Norrænu löndin eru svipuð hvert öðru. Þess vegna er skynsamlegt að miðla reynslu á milli landanna. Það verður hægt með hjálp leiðarvísisins, sem veitir innsýn í árangursrík úrræði til að stuðla að aðlögun kvenna af erlendum uppruna á vinnumarkaði,“ segir Catrine Bangum, aðalráðgjafi hjá Norrænu ráðherranefndinni. Aðdragandi leiðarvísisins, sem ber heitið „Veje til beskæftigelse for flygtninge- og indvandrerkvinder“, er að í norrænu löndunum er atvinnuþátttaka kvenna af erlendum uppruna lítil en eftirspurn eftir vinnuafli mikil. Þar að auki sýnir reynsla frá löndunum að árangursrík aðlögun kvenna af erlendum uppruna á vinnumarkaði hefur einnig góð áhrif á aðlögun barna þeirra. Þessi jákvæðu áhrif á leiðarvísirinn að efla og styðja við.
Árangursríkir bestu starfshættir
Á undanförnum árum hefur fjölda verkefna verið ýtt úr vör til að fjölga konum af erlendum uppruna á vinnumarkaði. Þó hefur skort yfirsýn og þekkingu á þeim aðgerðum og verkefnum sem reynst hefur hentugt að leggja til grundvallar á sviðinu. Leiðarvísinum er ætlað að veita slíka yfirsýn. Leiðarvísirinn er aðgengilegur öllum en markhópurinn er sérfræðingar og millistjórnendur hjá sveitarfélögum og ríki sem vinna að skipulagningu staðbundinna og landsbundinna verkefna í tengslum við aðlögun að vinnumarkaði.
Norrænu löndin eru svipuð hvert öðru. Þess vegna er skynsamlegt að miðla reynslu á milli landanna. Það verður hægt með hjálp leiðarvísisins, sem veitir innsýn í árangursrík úrræði til að stuðla að aðlögun kvenna af erlendum uppruna á vinnumarkaði.
Kortlagning byggð á tengslanetum
Leiðarvísirinn er unninn með hliðsjón af kortlagningu, byggðri á tengslanetum, yfir rannsóknir og greiningar sem unnar hafa verið í norrænu löndunum, auk hugmynda fagfólks í löndunum. Kortlagningin bendir til þess að augljós ávinningur verði af því að fjárfesta í aukinni atvinnuþátttöku kvenna af erlendum uppruna. Rambølls Management Consulting samdi leiðarvísinn í samstarfi við Rambølls konsulenter í Danmörku, Noregi og Svíþjóð.