Yfirlýsing frá ráðherrum stafrænnar þróunar um sannprófun kennsla þvert á landamæri á svæðinu
Upplýsingar
Mikil útbreiðsla og notkun rafrænna skilríkja, ásamt áreiðanlegum þjóðskrám og traustum stjórnarháttum í tengslum við auðkennismál, eru þættir sem öll löndin á þessu svæði eiga sameiginlega. Þessir þættir hafa skilað sér í þróuðum stafrænum innviðum. Þetta gerir íbúum svæðisins kleift að tengjast þúsundum opinberra og einkarekinna þjónusta með öruggum hætti án vandræða.
Með enn frekari samþættingu svæðisins fyrir augum vinna yfirvöld landanna á sviði rafrænna skilríkja að því að gera íbúum svæðisins kleift að nota innlend rafræn skilríki til þess að fá aðgang að þjónustu þvert á landamæri innan svæðisins.
Við, ráðherrar stafrænnar þróunar á Norðurlöndum og í Eystrasaltslöndunum, munum færa okkur í nyt þann styrk og þá þróun sem átt hefur sér stað í löndum okkar og byggja ofan á núverandi lagaramma til þess að tryggja að samstarf Norðurlanda og Eystrasaltslandanna á sviði rafrænna skilríkja verði sameiginlegur grundvöllur fyrir sannprófun kennsla þvert á landamæri á svæðinu.
Til þess að gera þetta kleift munum við, ráðherrar málefna stafrænnar þróunar á Norðurlöndum og í Eystrasaltslöndunum:
- Viðurkenna að í gæðum og samræmingu stafrænna innviða, lausna varðandi rafræn skilríki og þjóðskráa í löndum okkar felst sameiginlegur styrkur í þágu þess að efla stafrænan hreyfanleika þvert á landamæri á svæðinu.
- Viðurkenna brýna þörf á lausnum þegar kemur að sannprófun kennsla og á því að slíkar lausnir verði stafrænum þjónustum aðgengilegar til þess að slíkar þjónustur geti samþykkt auðkenningu með rafrænum skilríkjum frá öðrum löndum innan svæðisins.
- Leggja á það áherslu að lausnir varðandi sannprófun kennsla þurfi að hanna og innleiða á vettvangi hvers lands fyrir sig á grundvelli viðurkenndra staðla og samstarfs Norðurlanda og Eystrasaltslandanna sem byggist á fyrirliggjandi lagaramma á svæðinu og í Evrópusambandinu.
- Fela samstarfi Norðurlanda og Eystrasaltslandanna á sviði rafrænna skilríkja og stafrænnar væðingar að þjóna sem helsti samstarfsvettvangur vegna vinnu í tengslum við sannprófun kennsla yfir landamæri á svæði okkar og að taka saman vegvísi þar sem fram kemur til hvaða marghliða aðgerða þarf að grípa og hvaða aðilar skulu koma að því.
- Hvetja lögbær yfirvöld í löndum okkar, svo sem þjóðskrár og veitendur stafrænnar þjónustu, til þess að innleiða sannprófun kennsla þvert á landamæri í stefnu sína.
- Einsetja okkur að vinna að marghliða samkomulagi á milli landa okkar sem mun leiða til áreiðanlegri, greiðari og öruggari sannprófunar kennsla einstaklinga þvert á landamæri á svæðinu í samræmi við núverandi og væntanlegar reglugerðir Evrópusambandsins.