Atvinnuleit í Finnlandi

Þú getur sótt um vinnu í Finnlandi eða frá öðru landi áður en þú kemur til Finnlands. 

Einnig er hægt að koma til Finnlands meðan á atvinnuleit stendur og fá þar atvinnuleysisbætur, en þá þarf að skrá sig á atvinnuleysisskrá í brottfararlandinu með góðum fyrirvara. Nánari upplýsingar  eru hér fyrir neðan, sjá tengilinn „Atvinnulaus til Finnlands í atvinnuleit“.

Almennar upplýsingar um það að starfa í Finnlandi og málefni því tengd eru á síðunni Að starfa í Finnlandi. Uppýsingar um ráðningarsamninga eru á síðunni Réttindi og skyldur launafólks í Finnlandi.

Hægt er að skrá sig í atvinnuleit hjá TE-þjónustunni , sem er vinnumálaskrifstofa. Hafir þú finnskt rafrænt auðkenni getur þú einnig notað það til að skrá þig í atvinnuleit á vefnum.

Gott er að kynna sér vefþjónustu Vinnumarkaðstorgsins (Työmarkkinatori). Hún býður upp á ýmsar þjónustuleiðir fyrir fólk í atvinnuleit, svo sem ráðgjöf auk ýmiss konar námskeiða og þjálfunar. Á vefsvæði TE-þjónustunnar er einnig tengill á leitarsíðu fyrir laus störf, þar sem finna má upplýsingar um öll þau lausu störf sem skráð hafa verið hjá TE-þjónustunni.

Mörg fyrirtæki og stofnanir auglýsa laus störf á eigin heimasíðum, gegnum tengslanet sín eða gegnum ráðningarfyrirtæki. Störf innan opinberrar stjórnsýslu eru auglýst á síðunni Valtiolle.fi.

Lausar stöður eru einnig auglýstar í dagblöðum og á vefsíðum dagblaða. Hægt er að lesa helstu finnsku dagblöðin í lestrarsölum á bókasöfnum finnsku sveitarfélaganna. 

Einnig er gott að nýta eigin tengslanet í atvinnuleit. Mörg ný störf eru þess eðlis að ráðið er í þau án opinberra auglýsinga.

EURES (European Employment Services) er atvinnumiðlun Framkvæmdastjórnar Evrópusambandsins, en auk ESB-landa tekur hún til Noregs, Íslands, Lichtenstein og Sviss. Á vefsvæði EURES  er hægt að skoða auglýsingar um lausar stöður frá vinnumálastofnunum aðildarlandanna.

Þar eru einnig tengiliðaupplýsingar EURES-ráðgjafa í hinum ýmsu löndum. EURES-ráðgjafi í þinni heimabyggð getur aðstoðað þig varðandi málefni sem tengjast því að starfa í Finnlandi. 

Einnig er að finna gagnlegar ábendingar hér fyrir neðan undir fyrirsögninni Atvinnuleit í Finnlandi. Fyrirtæki auglýsa stöður á sænsku og ensku ef færni í þessum tungumálum er krafist til að gegna viðkomandi starfi.

Atvinnulaust fólk frá aðildarlöndum ESB og EES heldur atvinnuleysisbótum frá brottfararlandi sínu í lengsta lagi í þrjá mánuði eftir að komið er til Finnlands í atvinnuleit. Til að fá atvinnuleysisbætur áfram greiddar þarf að fylla út eyðublað PD U2 eða E303 í brottfararlandinu og skrá sig í atvinnuleit hjá TE-þjónustunni.

Áður en þú heldur til annars lands í atvinnuleit skaltu hafa samband með góðum fyrirvara við þá stofnun sem greiðir þér atvinnuleysisbætur og kynna þér skilyrði, tímamörk og mögulega bið eftir málsmeðferð. Þú finnur nánari upplýsingar á upplýsingasíðum brottfararlands þíns um atvinnuleysisbætur og hjá Vinnumarkaðstorginu.

Fái fólk vinnu í Finnlandi fær það almannatryggingar þar á sömu kjörum og annað vinnandi fólk þar í landi. Meginreglan er að það hættir þá að borga í atvinnuleysissjóð þess lands sem áður var starfað í og byrjar að greiða í samsvarandi sjóð í Finnlandi.

Fái einstaklingur í atvinnuleit ekki vinnu í Finnlandi innan þriggja mánaða frá komunni þangað, og vilji hann ekki tapa rétti sínum til atvinnuleysisbóta, þarf hann að snúa aftur til heimalandsins.