Ökutæki í Finnlandi

Ert þú að koma með ökutæki til Finnlands vegna frís, tímabundinnar dvalar eða vegna búferlaflutninga til lengri tíma? Svarið við þessari spurningu sker úr um það hvort þú þarft að láta skoða ökutæki þitt, skrá það og greiða skatt af því í Finnlandi. Um skráningu á Álandseyjum gilda sérstakar reglur sem hægt er að lesa um á síðunni Innflutningur á ökutækjum til Álandseyja. Upplýsingar um ökuréttindi eru á síðunni Ökuréttindi í Finnlandi.

Ekki er nauðsynlegt að greiða skatt af ökutæki sem komið er með til skammtímadvalar eða í frí til Finnlands. Ökutækið þarf að hafa gildar ökutækjatryggingar í því landi þar sem það er skráð. Nánari upplýsingar á vefsvæði finnskra skattayfirvalda (Verohallinto).

Ríkisborgari annars norræns lands sem dvelur í Finnlandi skemur en 12 mánuði má nota ökutæki skráð í öðru norrænu landi til að ferðast um á í Finnlandi í sex mánuði að hámarki, en hægt er að sækja um framlengingu á þeim tíma. Upplýsingar um ökutæki til annarra nota en ferðalaga veita finnsk skattayfirvöld (Verohallinto).

Í einhverjum tilvikum geta einstaklingar með fasta búsetu í Finnlandi einnig átt rétt á að nota ökutæki sem skráð er í öðru landi tímabundið í Finnlandi, án þess að greiða þar af því skatt. Nánari upplýsingar veita finnsk skattayfirvöld; Verohallinto.

Athugaðu þó að ökutækið þarf að vera með gilda ökutækjatryggingu í því landi þar sem það er skráð, og að fæst tryggingafélög vilja tryggja ökutæki ef eigandinn hefur ekki fasta búsetu í landinu.

Flytjir þú til Finnlands til frambúðar með ökutæki meðferðis, þarf ökutækið að gangast undir skoðun og skráningu í Finnlandi og af því þarf að greiða bifreiðaskatt. Ökutækjum sem koma frá norrænum löndum utan Evrópusambandsins, þ.e. Íslandi eða Noregi, þarf einnig að gera grein fyrir í tollinum, en að vissum skilyrðum uppfylltum getur ökutæki sem komið er með í búferlaflutningum verið undanskilið innflutningsskatti og tolli.

Til að geta notað ökutæki í Finnlandi allt frá komudegi þarf að tilkynna finnsku skattstofunni (Verohallinto) um notkun þess við komuna til landsins. Það er hægt að gera rafrænt á netinu.

Nánari upplýsingar eru á heimasíðum finnskra skatt- og tollayfirvalda.

Bifreiðaskattur

Þegar ökutæki hefur verið flutt til Finnlands þarf að gera sérstaklega grein fyrir því gagnvart skattayfirvöldum (Verohallinto) innan 5 daga frá því að tilkynning um notkun þess í landinu hefur verið staðfest. Nánari upplýsingar um bifreiðaskatt eru á vefsvæði finnskra skattayfirvalda (Verohallinto).

Skoðun og skráning

Ökutæki sem flutt er til Finnlands þarf að gangast undir skráningarskoðun á skoðunarstað sem sér um upphafsskráningar ökutækja áður en skráning getur farið fram. Við skráningarskoðun þarf að framvísa skráningarskírteini frá upprunalandinu þar sem m.a. kemur fram hvenær ökutækið var fyrst skráð eða tekið í notkun. Að skráningu lokinni fær bifreiðareigandi skráningarvottorð og finnskar skráningarplötur.

Nánari upplýsingar um skráningarskoðun, staði þar sem slíkar skoðanir eru framkvæmdar og um skráningu ökutækja veitir finnska samgöngustofan (Liikenne- ja viestintävirasto eða Traficom).

Nota þarf vetrardekk, sé það nauðsynlegt sökum veðurs eða færðar, í nóvember, desember, janúar, febrúar og mars. Á því tímabili sem skylt er að nota vetrardekk þarf mynstursdýpt hjólbarðanna að vera að lágmarki 3 millimetrar. Vetrardekkin geta ýmist verið negld eða ónegld.

Nagladekk er leyfilegt að nota utan tilskilins vetrardekkjatímabils ef ástæða er til sökum veðurs eða færðar. Nánari upplýsingar á vefsvæði finnsku umferðarstofunnar (Liikenneturva).

Fólk með fötlun getur fengið skattaívilnanir vegna ökutækja, auk ýmissa annarra styrkja og afslátta til að greiða fyrir hreyfanleika. Nánari upplýsingar eru á síðunni Aðstoð vegna hjálpartækja fatlaðra og þjónusta við fatlaða í Finnlandi.

Sé bifreið skráð í Finnlandi þarf ekki að skrá hana í öðru norrænu landi meðan á skammtímadvöl þar stendur. Mismunandi reglur gilda um það í norrænu löndunum hve lengi má aka bifreið án þess að skrá hana inn í landið. Lestu meira um reglurnar í hverju landi fyrir sig með því að smella á tenglana hér að neðan. 

Athugaðu þó að ökutækið þarf að vera með gilda ökutækjatryggingu í því landi þar sem það er skráð, og að fæst tryggingafélög vilja tryggja ökutæki ef eigandinn hefur ekki fasta búsetu í landinu.