Fulltrúar Norðurlandaráðs sýna Póllandi og Eystrasaltsríkjum stuðning með heimsókn

Karin Åström mun hefja heimsókn sína í Vilníus þann 20. mars og halda þaðan ferðinni áfram til Varsjár, þar sem Hans Wallmark mun hitta hana 21 mars. Mánudaginn 24. mars liggur leið þeirra svo til Ríga og Tallinn.

Forseti og varaforseti Norðurlandaráðs munu funda með fulltrúum forsætisnefndar Eystrasaltsríkjaráðs og formönnum utanríkisnefnda landanna. Í Varsjá verður svo fundað með forseta efri deildar pólska þjóðþingsins.

Karin Åström og Hans Wallmark hvetja rússnesk stjórnvöld til að grípa til ráðstafana til að draga úr spennuástandi í Úkraínu:

„Sú ákvörðun að efna til ólöglegrar þjóðaratkvæðagreiðslu á Krímskaga um að gangast rússneska ríkjasambandinu á vald brýtur í bága við úkraínsku stjórnarskrána og er óásættanleg. Við hvetjum rússnesk stjórnvöld til að bregðast skjótt við til að draga úr spennunni sem leitt gæti til nýrra kaldastríðstíma í Evrópu.“