Norðurlandaráð ætlar að styrkja tjáningarfrelsi og góða blaðamennsku
– Eitt af mikilvægustu gildum okkar er það að við höfum frelsi til að skrifa og segja það sem við viljum. Með hliðsjón af þeim hörmulegu atburðum sem gerðust í tengslum við Charlie Hebdo í París ætlar Norðurlandaráð að beita sér fyrir því að frjálsir fjölmiðlar, góð blaðamennska og tjáningarfrelsi verði áfram meðal aðalbaráttumála Norðurlanda. Norðurlöndin ættu að taka höndum saman um að koma á fót lykilvettvangi fyrir samskipti um blaðamennsku og frjálsa fjölmiðlun til að efla alla þætti fjölmiðlunar og safna saman helstu aðilum, þekkingu og kunnáttu á þessu sviði, segir í yfirlýsingu frá menningar- og menntamálanefnd Norðurlandaráðs.
Þróun stafrænnar tækni og efnahagslegar breytingar stuðla jafnframt að stöðugum og vaxandi þrýstingi á fjölmiðlun og blaðamennsku. Með nýjum samskiptavettvangi vilja stjórnmálamennirnir búa frjálsum fjölmiðlum bestu mögulegu skilyrði með því að efla fagmennsku og sjálfstæði blaðamanna með hæfniþróun og miðlun þekkingar og reynslu þvert á landamæri Norðurlanda.
Norðurlönd geta jafnframt aðstoðað blaða- og listamenn sem sæta ofsóknum í heimalöndum sínum. Hjá okkur er hefð fyrir því að bjóða upp á griðastaði og góð starfsskilyrði. Ýmsar norrænar borgir eru þátttakendur í alþjóðlegum samtökum skjólborga sem einkum aðstoða rithöfunda og blaðamenn sem sæta ofsóknum.
– Við búum yfir mikilvægri reynslu á Norðurlöndum sem við getum miðlað og þar með stuðlað að góðri umræðu um stöðu tjáningarfrelsis, meðal annars á alþjóðavettvangi. Tjáningarfrelsið á áfram að vera einn af hornsteinum norrænna samfélaga og við þurfm að standa vörð um það og beita okkur fyrir opinni og lýðræðislegri umræðu, taka þingmennirnir í menningar- og menntamálanefndinni fram.
Menningar- og menntamálanefnd Norðurlandaráðs ræddi tjáningarfrelsi á fundi sínum á Álandseyju og ætla nú vinna áfram með tillöguna.