Umhverfisráðherrar hvetja til sjálfbærrar nýtingar á plasti
„Stefnubreyting verður að eiga sér stað um allan heim ef takast á að draga úr magni plastúrgangs og örplasts í hafinu. Með norrænni plastáætlun stuðla löndin að því að dregið verði úr afleiðingum plastmengunar. Ég bind vonir við raunhæft samstarf um viðeigandi aðgerðir,“ segir Vidar Helgesen, loftslags- og umhverfisráðherra Noregs og formaður norrænu ráðherranefndarinnar um umhverfis- og loftslagsmál á árinu 2017.
Áætlunin er byggð á fyrri samnorrænum aðgerðum í plastmálum. Sem stefnumótunartæki á hún að efla samlegðaráhrif í norrænu samstarfi og auka enn frekar þá þekkingu og vitund um plast á Norðurlöndum. Ráðherrarnir benda sérstaklega á viðfangsefni vegna úrgangs í hafinu og jafnframt það hlutverk sem plastið gegnir í hringrásarhagkerfinu.
„Norðurlöndin verða að vera forystusvæði þegar kemur að því að draga úr umhverfisáhrifum af völdum plasts. Við þurfum að grípa til aðgerða til að minnka losun örplasts í vötn og hafið. Mikilvægt er að norrænu löndin dýpki samstarf sitt og skiptist á þekkingu og reynslu,“ segir Karolina Skog, umhverfisráðherra Svíþjóðar.
Sex stefnumótandi áherslusvið
Norræna plastáætlunin skiptist í sex stefnumótandi áherslusvið en þau eru:
1) forvarnir gegn myndun plastúrgangs og stuðningur við hönnun fyrir endurnýtingu, lengri endingartíma og endurvinnslu;
2) skilvirk söfnunarkerfi fyrir úrgang og aukin endurvinnsla á plastúrgangi;
3) samstarf um að stöðva myndun plastúrgangs í hafinu og finna hagkvæmar leiðir til hreinsunar;
4) að þróa þekkingu á örplasti og bera kennsl á aðgerðir sem draga úr losun örplasts í umhverfið;
5) að dýpka þekkingu á umhverfisspori plasts sem er lífgrundað og lífbrjótanlegt;
6) að dýpka þekkingu á skaðlegum efnum við endurvinnslu á plasti.
Styðja alþjóðlegar aðgerðir
Plastáætlun á að marka stefnu í aðgerðum sem draga úr plastmengun á Norðurlöndum en hún er einnig framlag landanna til framkvæmdar á alþjóðasamningum, þar á meðal sjálfbærnimarkmiðum SÞ (áætlun til ársins 2030), síðustu yfirlýsingum Umhverfisþings SÞ (UNEA) og átaki Umhverfisáætlunar Sameinuðu þjóðanna (UNEP) gegn úrgangi í hafi, #CleanSeas.
Framkvæmdastjórn ESB vinnur að undirbúningi áætlunar um plast í hringrásarhagkerfi. Í bréfi til framkvæmdastjórnarinnar undirstrika umhverfisráðherrar Norðurlanda mikilvægi þess að skapaður verði góður eftirmarkaður fyrir plast, að hvatt verði til hönnunar fyrir endurvinnslu og að ráðist í aðgerðir gegn örplasti í neysluvörum.
Sjá einnig:
- Átak um hreinni höf á Norðurlöndum og á heimsvísu #CleanSeas
