Stjórnsýsluhindranaráðið fær tvo nýja fulltrúa

Bertel Haarde er vel þekktur í norrænu samstarfi. Hann hefur tvisvar sinnum gegnt embætti forseta Norðurlandaráðs auk þess að gegna ráðherraembætti mörgum sinnum, meðal annars með ábyrgð á norrænum málefnum. Þá var Haarder formaður Stjórnsýsluhindranaráðsins árið 2020.

Haarder er gamalreyndur í dönskum stjórnmálum. Hann var fyrst kosinn á danska þingið árið 1975 og hætti á þingi fyrir síðustu kosningar, árið 2022.

Morten Dahlin, samstarfsráðherra Norðurlanda í Danmörku, skipaði Bertel Haarder sem fulltrúa Danmerkur í Stjórnsýsluhindranaráðinu. Skipunin gildir frá 1. mars til 31. desember 2024. Haarder tekur sæti Annette Lind sem tekur við embætti aðalræðismanns í Flensborg þann 1. mars.

„Ég er mjög ánægður með að hafa verið skipaður. Ég brenn fyrir því norræna og það er allt of mikið um óþarfa stjórnsýsluhindranir á milli landa okkar, bæði stafrænar og í raunheimi,“ segir Bertel Haarder.

Fredrik Karlström hefur einnig mikla reynslu af stjórnmálum og hefur unnið mikið að norrænum málefnum. Hann er fyrrverandi atvinnumálaráðherra á Álandseyjum og hefur átt sæti á lögþingi Álandseyja síðan 2003. Hann hefur tvisvar sinnum gegnt ráðherraembætti og margsinnis tekið þátt í norrænum ráðherrafundum auk þess að hafa átt sæti í landsdeild Álandseyja í Norðurlandaráði 2007–2011.

Frjáls för og vinnan að afnámi stjórnsýsluhindrana eru honum hjartans mál.

„Það er mér mikill heiður að fá að halda áfram að vinna á norrænum vettvangi í Stjórnsýsluhindranaráðinu. Ég hef metnað til þess að raungera framtíðarsýnina um frjálsa för á Norðurlöndum fyrir alla Norðurlandabúa. Með því að takast markvisst á við stjórnsýsluhindranir og lágmarka þær stuðlum við að aukni frelsi og tækifærum fyrir bæði einstaklinga og fyrirtæki. Þetta stuðlar ekki einungis að samþættara svæði heldur er þetta lykilatriði í því að ýta undir samstöðu, örva hagvöxt og viðhalda hinu einstaka norræna velferðarlíkani,“ segir Fredrik Karlström.