Hæfni framtíðarinnar

Framtíðin felur í sér breytingar. Hún gleður og hræðir. Í breytingum felast bæði tækifæri og áskoranir. Breytingar krefjast umbreytinga hjá okkur sjálfum. Læra nýja hluti. Taka á móti nýjum lausnum. Leysa ný vandamál. Spyrja gagnrýnna spurninga. Breytingar kalla á nýja hæfni. Formlega og óformlega. Þverfaglegt samstarf, hugmyndauðgi, nýsköpun, gagnrýnin hugsun, stafræn dómgreind og lýðræðisþroski er mikilvægara en nokkru sinni fyrr.

Hæfni framtíðarinnar byggir á mörgum þeim gildum sem við eigum sameiginleg og stöndum vörð um á Norðurlöndum. Við trúum á lýðræði, tjáningarfrelsi, jafnrétti, heiðarleika og gagnsæi. Þetta eru gildi okkar sem eru forsenda þess að okkur takist að skapa nýja hluti, þróa þá og framkvæma. Og við erum í forystu þegar kemur að trausti. Við treystum hvert öðru og það er stærsti styrkleiki okkar þegar við þurfum að takast á við áskoranir framtíðarinnar. Traustið á að saman getum við fundið sameiginlegar lausnir.

Gegnum Norrænu ráðherranefndina um menntamál og rannsóknir vinnum við saman að því að skapa einmitt þetta. Að því að finna nýjar norrænar lausnir á sameiginlegum áskorunum. 

Menntun er lykill að hæfni framtíðar. Það er einnig mat Norðurlandabúa. Raunar nefna þeir menntun sérstaklega sem eitt af mikilvægustu samstarfssviðunum á Norðurlöndum – og þeir vilja gjarnan sjá meira af því.

Nám á sér stað allt lífið. Í leikskólum, skólastofum, fyrirlestrarsölum, á leikvöllum skólanna og vinnustöðum, í kvöldskólum og starfsnámi. Og einnig í frítímanum, gegnum stafræna miðla, í íþróttasölum, við varðeldinn, í kórnum og með vinunum. Á öllum þessum sviðum þróast og birtist hæfnin til þess að grípa tækifæri framtíðarinnar og takast á við áskoranirnar. Til þess að leggja sitt af mörkum í næstu tæknibyltingu. Til þess að gera heiminn betri fyrir komandi kynslóðir. Þetta snýst líka um þroska. Um að virkja sameiginleg norræn gildi á nýjan hátt.

Norðurlöndin hafa bæði forsendur og metnað til þess að vera í forystu þegar rætt er um hæfni til framtíðar. Það er nefnilega hægt að gera hlutina á norrænan hátt – einnig í framtíðinni.

Drifkrafturinn? Hann kemur frá okkur sjálfum. Hinum 27 milljónum íbúa Noregs, Svíþjóðar, Danmerkur, Finnlands, Íslands, og Grænlands, Álandseyja og Færeyja. Saman sköpum við framtíðina.