Samstarfsáætlun norrænu ráðherranefndarinnar í vinnumálum 2022–2024

Samstarfsáætlunin útfærir nánar framkvæmdaáætlun Norrænu ráðherranefndarinnar um Framtíðarsýn okkar fyrir árið 2030 og tólf markmið hennar auk þess að gera grein fyrir því hverju norrænt samstarf á sviði atvinnulífs á að stuðla að fram til ársins 2024. Norræna ráðherranefndin skal leggja sitt af mörkum til að þróa vinnumarkað sem mætir þeim áskorunum sem græn umskipti og stafræn þróun hafa í för með sér og sem styður við frjálsa för á Norðurlöndum. Norrænt kerfi atvinnulífs byggir að stórum hluta á jafnrétti, félagslegu öryggi og samtali á milli aðila vinnumarkaðarins. Á sama tíma stendur norrænn vinnumarkaður frammi fyrir verulegum breytingum í kjölfar meðal annars tækniþróunar, stafrænnar þróunar á vinnustöðum, lýðfræðilegrar þróunar og nýrra ráðningarforma. Í samstarfsáætluninni er sjónum beint að þessum áskorunum og því hvernig norrænt samstarf getur lagt sitt af mörkum til að leysa úr þeim.