Skráning blaðamanna hafin á þing Norðurlandaráðs í Helsinki
Meðal mikilvægra mála sem þingað verður um má nefna Norðurlönd sem samþættasta svæði í heimi, afnám stjórnsýsluhindrana og norrænt traust. Mál þessi verða rædd á leiðtogafundi þingmanna Norðurlandaráðs og norrænu forsætisráðherranna sem haldinn verður 31. október.
Viðburður um norrænt orkumálasamstarf verður í tengslum við þingið mánudaginn 30. október. Þar verður fjallað um nýja skýrslu um orkumál eftir Jorma Ollila, fyrrum framkvæmdastjóra Nokia og hvernig samstarfið eigi að þróast á næstu árum. Viðburðurinn er opinn fréttafólki.
Ýmis pólitísk mál verða á dagskrá 69. þings Norðurlandaráðs, þar á meðal aðlögunarmál og heimsmarkmið Sameinuðu þjóðanna um sjálfbæra þróun til ársins 2030. Alþjóðamál líðandi stundar og varnar- og öryggismál verða rædd 1. nóvember þegar utanríkis- og varnarmálaráðherrarnir flytja skýrslu sína fyrir þingheimi Norðurlandaráðs. Forsætisráðherrar Norðurlandanna funda með kollegum sínum frá Eystrasaltsríkjunum í tengslum við þingið.
Þingið fer fram í nýuppgerðum húsakynnum finnska þjóðþingsins í Helsinki.
Verðlaunaafhending Norðurlandaráðs
Miðvikudaginn 1. nóvember verður hulunni svipt af því hver hreppa verðlaun Norðurlandaráðs. Verðlaunaafhendingin fer fram í Finlandiahúsinu. Að afhendingu lokinn verður blaðamannafundur og myndataka.
Fréttamenn sem vilja vera viðstaddir þing Norðurlandaráðs, verðlaunaafhendinguna og orkumálaviðburðinn þurfa að skrá sig í síðasta lagi 27. október 2017 kl. 14. Skráning krefst blaðamannaskírteinis. Skráningin gildir einnig um blaðamannafundi ráðherranna sem haldnir verða í tengslum við þingið.
Norðurlandaráð er þing opinbers samstarfs Norðurlanda. Á árlegu haustþingi fer fram pólitísk umræða milli Norðurlandaráðs og fulltrúa ríkisstjórnanna í Norrænu ráðherranefndinni. Hægt er að fylgjast með þinginu á Twitter undir kassamerkjunum #nrsession og #nrpol
