Formennskuáætlun Íslands í Norðurlandaráði 2024

Öryggismál hafa undanfarin ár verið eitt allra mikilvægasta málefnasvið Norðurlandaráðs og í formennskuáætlun Íslands er áfram lögð áhersla á að vinna í þágu friðar og öryggis, með sérstakri áherslu á norðurslóðir. Norðurlönd þurfa að leggja áherslu á það að norðurslóðir verði lágspennusvæði þegar kemur að hernaði og stuðla að friðsamlegu samstarfi á alþjóðavettvangi.

Í formennskutíð Íslands verður einnig lögð áhersla á að kanna hvernig enn betur má tryggja að þátttakendur í norrænu samstarfi sem ekki hafa skandinavískt mál að móðurmáli geti tekið þátt í samstarfinu á jöfnum grundvelli með móðurmáli sínu. Meðal annars verður kannað hvort nýta megi nýja máltækni sem aðstoð við þýðingar og túlkun.

Réttindi og tækifæri minnihlutahópa og jaðarsettra hópa til að lifa góðu lífi, sérstaklega á strjálbýlli jaðarsvæðum, eru einnig á dagskrá. Í áætluninni er bent á að Norðurlönd hafi vakið athygli á heimsvísu fyrir þau framfaraskref sem hafa verið stigin til að efla kynjajafnrétti og stöðu hinsegin fólk og að mikilvægt sé að halda þeirri vinnu áfram.

Í formennskuáætlun Íslands er vakin athygli á þeirri vinnu sem forsætisnefnd Norðurlandaráðs hefur hafið við að endurskoða Helsingforssamninginn, sem kveður á um hvernig haga beri hinu opinbera norræna samstarfi. Verði samningurinn uppfærður myndi það snerta öryggismál, loftslagsmál og hvaða tungumál skuli notuð á fundum Norðurlandaráð.