Blindsone – Noregur

Blindsone er átakanleg saga af móður sem reynir sitt besta til að skilja geðsjúkdóm dóttur sinnar. Myndin er einstaklega næm athugun á þeim gráu svæðum – eða blindu blettum – sem geta torveldað skilning foreldra eða samfélagsins á geðrænum vandamálum, en einnig er varpað ljósi á þann vanda sem skapast þegar samfélag nútímans telur það eitt eftirsóknarvert sem tengist hamingju og velgengni fólks. Hvernig opnum við á erfiðar hugsanir og vandamál þegar ekki er ætlast til að við sýnum umheiminum neitt annað en ímynd fullkomnunar?

Blindsone er átakamikil saga sem hefst með kynningu á raunsæjum heimi, fer þaðan yfir í hneykslandi og tortryggilegar aðstæður og lýkur með endurlausn aðalpersóna sem hafa verið þjakaðar af áföllum og angist. Öll frásögnin rúmast í einni samfelldri senu, sem skilar sér í áhrifamiklum leik, myndatöku og hljóðhönnun. Tuva Novotny leikstýrir hér sinni fyrstu kvikmynd og tekst að nýta tæki og tól formsins með besta móti í þágu frásagnarinnar.

Tuva Novotny (1979) hóf leikferil sinn 16 ára gömul. Hún hefur leikið í fjölda mynda og þáttaraða, svo sem myndunum Krigen eftir Tobias Lindholm, sem hlaut tilnefningu til Óskarsverðlauna, Annihilation eftir Alex Garland og Borg vs. McEnroe eftir Janus Metz, og sjónvarpsþáttaröðum á borð við Crimes of Passion, Dag og Nobel.

Hún þreytti frumraun sína í leikstjórn árið 2010 með þáttaröðinni Dag fyrir norsku stöðina TV2, auk nokkurra þátta af Netflix-þáttaröðinni Lilyhammer og handritaskrifa fyrir þáttaröðina Rot í norska ríkissjónvarpinu, NRK.

Blindsone er fyrsta myndin í fullri lengd sem hún skrifar og leikstýrir. Myndin er tekin upp í einni samfelldri töku í rauntíma og hefur hlotið ýmis verðlaun á alþjóðlegum hátíðum, svo sem Silver Shell-verðlaun fyrir bestu leikkonu í aðalhlutverki (Pia Tjelta) á hátíðinni í San Sebastián, FIPRESCI-verðlaun í Gautaborg, New Talent Grand PIX á CPH PIX í Kaupmannahöfn og verðlaun sem besta myndin á kvikmyndahátíðinni í Bratislava. Myndin vann einnig til verðlauna sem besta myndin og fyrir bestu leikkkonu í aðalhlutverki á verðlaunahátíð norskra kvikmyndagagnrýnenda.

Novotny leikstýrði einnig sænsku myndinni Britt-Marie var här, sem byggð er á metsölubók eftir Fredrik Backman.

Elisabeth Kvithyll (1985) starfar hjá Nordisk Film Production í Noregi.

Síðan hún lauk námi við Norska kvikmyndaskólann árið 2012 hefur hún framleitt verðlaunastuttmyndirnar Å vokte fjellet eftir Izer Aliu (tilnefnd til Óskarsverðlauna nemenda 2013, besta stuttmyndin á Amanda-verðlaununum 2012) og Ja vi elsker eftir Hallvar Witzø („Special Mention“ á kvikmyndahátíðinni í Cannes 2014).

Fyrsta mynd hennar í fullri lengd, Blindsone, hefur átt velgengni að fagna bæði í heimalandinu og alþjóðlega síðan hún var frumsýnd í kvikmyndahúsum í ágúst 2018.

Titill á frummáli: Blindsone

Leikstjórn: Tuva Novotny

Handrit: Tuva Novotny

Framleiðandi: Elisabeth Kvithyll

Aðalhlutverk: Pia Tjelta, Anders Baasmo Christiansen, Oddgeir Thune

Framleiðslufyrirtæki: Nordisk Film Production

Lengd: 102 mínútur

Dreifing innanlands: Nordisk Film Distribution

Alþjóðleg dreifing: TrustNordisk