Iiro Rantala

Iiro Rantala er líklega sá finnski djasstónlistarmaður sem þekktastur er alþjóðlega. Auk starfa sinna sem tónskáld og píanóleikari, bæði á sviði djass og sígildrar tónlistar, hefur Rantala samið tónlist fyrir ótal leikverk og bíómyndir. Hann er þjóðþekktur í Finnlandi, þar sem hann hefur stýrt eigin þáttum í sjónvarpi og útvarpi. Dagblaðið Süddeutsche Zeitung skrifaði þetta um hann nýlega: „Iiro Rantala er nú, fremur en nokkru sinni fyrr, að spila það sem hann nýtur mest. Hárfín fjölbreytnin í hljómi hans og það ímyndunarafl sem einkennir stef hans eru ógleymanleg. Rantala kann að hrífa hlustendur með sér, vera trúður og töframaður, heillandi snillingur, húmoristi sem fer sínar eigin leiðir.“

Á síðastliðnum árum hefur hróður Rantala vaxið ört utan Finnlands og hefur hann sent frá sér fjölda athyglisverðra hljómplatna, svo sem einleiksplötuna Lost Heroes, plötu með túlkun Rantala á tónlist John Lennon sem ber heitið My Working Class Hero, og plötuna How Long Is Now? í samstarfi við fjölþjóðlegt tríó þekktra listamanna. Hvert og eitt þessara verka felur í sér merkingarþrungna og sérstæða staðhæfingu. Iiro Rantala hefur hlotið hin þýsku ECHO-verðlaun, verðlaun þýskra tónlistargagnrýnenda, finnsku Emma-verðlaunin og Pro Finlandia-orðuna.