Atvinnuleit á Grænlandi

Vinnumarkaðurinn á Grænlandi er sérstakur. Flest störf eru í opinbera geiranum eða í stórum fyrirtækjum sem eru í eigu landsstjórnarinnar. Einkageirinn er mjög lítill. Atvinnuleysi er mjög lítið og erfitt er að laða að vinnuafl í ákveðnar stöður í tilteknum atvinnugreinum. Atvinnumöguleikar eru góðir, einkum fyrir háskólamenntaða og heilbrigðisstarfsfólk.

Störf hjá hinu opinbera

Landsstjórn Grænlands er einn stærsti atvinnurekandi Grænlands og laus störf eru auglýst á vef landsstjórnarinnar Nanoq.

Grænlensk sveitarfélög hafa umsjón með ýmissi starfsemi sem í mörgum öðrum löndum yrði falin einkaaðilum. Grænland skiptist í fimm sveitarfélög: Avannaata í norðri, Qeqertalik og Qeqqata á vesturströndinni, Kujalleq í suðri og Sermersooq sem nær yfir landssvæði frá austurströndinni til vesturstrandarinnar.

Höfuðborg Grænlands, Nuuk, er í sveitarfélaginu Semersooq.

Aðrar starfagáttir

Landsstjórnin rekur starfagáttina suli.gl þar sem safnað er saman atvinniauglýsingum frá bæði opinberum og einkareknum fyrirtækjum á öllu Grænlandi.

Bæði opinberir atvinnurekendur og mörg fyrirtæki auglýsa í dönsku starfagáttinni Jobindex þar sem hægt er að leita sérstaklega að störfum á Grænlandi.

Fjölmiðlafyrirtækið Sermitsiaq AG rekur starfagátt þar sem störf á öllu Grænlandi eru auglýst.

HireMe er grænlensk starfagátt sem eingöngu miðast við Grænland. Þar er að finna störf í öllum grænlenskum sveitarfélögum.

Sumarstörf á Grænlandi

Nordjobb miðlar sumarstörfum til ungmenna á Norðurlöndum.

Hægt er að sækja um ef maður er:

• ríkisborgari í norrænu landi
• 18–30 ára

Það er kostur að tala sænsku, norsku eða dönsku en í sumum tilvikum er einnig hægt að skila inn umsóknum á ensku.

Samband Norrænu félaganna í Kaupmannahöfn hefur umsjón með Nordjobb.