Dvalar- og atvinnuleyfi í Danmörku

Ef þú ert finnskur, íslenskur, norskur eða sænskur ríkisborgari geturðu búið, stundað nám og starfað í Danmörku án dvalar- og atvinnuleyfis.

Ef þú ert ríkisborgari annars ESB- eða EES-lands eða Sviss hefurðu rétt til að ferðast til Danmerkur og hefja störf. Ef þú ætlar að dvelja í Danmörku í meira en þrjá mánuði þarftu að sækja um ESB-dvalarskjal.

Ef þú ert ríkisborgari lands utan Norðurlanda, ESB, EES eða Sviss þarftu að jafnaði dvalar- og atvinnuleyfi til að búa og starfa í Danmörku.

Þú getur lesið um reglurnar og sótt um á nyidanmark.dk, sem er opinber gátt fyrir útlendinga sem vilja heimsækja, búa eða starfa í Danmörku.

Ef þú ert finnskur, íslenskur, norskur eða sænskur ríkisborgari geturðu ferðast frjálst til Danmerkur til að búa, stunda nám eða starfa. Þú þarft hvorki vegabréfsáritun né dvalar- og atvinnuleyfi.

Ef fjölskyldumeðlimir þínir eru sjálfir norrænir ríkisborgarar geta þeir einnig búið og starfað í Danmörku án dvalar- og atvinnuleyfis. Ef fjölskyldumeðlimir þínir eru ekki norrænir ríkisborgarar þurfa þeir yfirleitt að sækja um dvöl samkvæmt ESB-reglum.
 

Ef þú vilt dvelja í Danmörku í meira en þrjá mánuði þarftu að jafnaði að hafa dvalargrundvöll samkvæmt ESB-reglum. Það getur til dæmis verið að þú:

• starfir í Danmörku
• sért sjálfstætt starfandi í Danmörku
• stundir nám í Danmörku
• hafir nægilegt fé til að framfleyta þér
• sért fjölskyldumeðlimur ESB-borgara með dvöl í Danmörku.

Ef þú ert ríkisborgari ESB- eða EES-lands eða Sviss geturðu dvalið í Danmörku í allt að þrjá mánuði án þess að sækja um ESB-dvalarskjal. Ef þú ert að leita að vinnu í Danmörku geturðu dvalið í Danmörku í allt að sex mánuði án ESB-dvalarskjals.

Þú þarft að sækja um ESB-dvalarskjal hjá Styrelsen for International Rekruttering og Integration, SIRI, á nyidanmark.dk. Þú þarft ekki að bíða eftir ESB-dvalarskjalinu til að hefja störf í Danmörku.

Ef þú ert fjölskyldumeðlimur ESB- eða EES-ríkisborgara eða ríkisborgara Sviss geturðu átt rétt á dvöl í Danmörku samkvæmt ESB-reglum. Reglurnar ráðast meðal annars af ríkisfangi þínu og því hvaða dvalargrundvöll fjölskyldumeðlimur þinn hefur í Danmörku.

Ef þú ert sjálf/ur ríkisborgari ESB- eða EES-lands eða Sviss geturðu sótt um ESB-dvalarskjal.

Ef þú ert ríkisborgari lands utan ESB, EES eða Sviss og uppfyllir skilyrði fyrir dvöl sem fjölskyldumeðlimur ESB-borgara þarftu að sækja um dvalarkort. Þú átt rétt á að dvelja í Danmörku á meðan umsókn þín er til meðferðar ef þú uppfyllir skilyrði fyrir dvöl samkvæmt ESB-reglum.

Ef þú ert ríkisborgari lands utan Norðurlanda, ESB, EES eða Sviss þarftu að jafnaði dvalar- og atvinnuleyfi til að búa og starfa í Danmörku.

Til eru nokkrar mismunandi leiðir til að fá dvalar- og atvinnuleyfi í Danmörku. Hvaða leið þú getur sótt um eftir ræðst meðal annars af starfi þínu, hæfni, launum og aðstæðum þínum að öðru leyti.

Þú þarft að hafa í huga að dvalar- og atvinnuleyfi í Danmörku gildir aðeins í Danmörku. Það veitir þér ekki rétt til að starfa í öðrum norrænum löndum eða öðrum Schengen-löndum.

Ef þú býrð í öðru landi og vilt starfa í Danmörku

Ef þú ert ríkisborgari lands utan Norðurlanda, ESB, EES eða Sviss og býrð í öðru landi en vilt starfa í Danmörku þarftu að jafnaði að sækja um atvinnuleyfi sem pendlari.

Atvinnuleyfi sem pendlari veitir þér ekki rétt til að búa í Danmörku. Ef þú vilt síðar flytja til Danmerkur þarftu að sækja um dvalar- og atvinnuleyfi.

Þú ættir einnig að hafa samband við útlendingayfirvöld í því landi þar sem þú býrð til að fá upplýsingar um hvort starf í Danmörku geti haft áhrif á dvalarleyfi þitt þar.

Ef þú ert með dvalarleyfi í öðru norrænu landi

Ef þú ert með dvalarleyfi í öðru norrænu landi veitir það ekki sjálfkrafa rétt til að búa eða starfa í Danmörku.

Ef þú vilt flytja til Danmerkur eða starfa í Danmörku þarftu að kanna hvort þú þurfir að sækja um danskt dvalar- og atvinnuleyfi. Þú ættir einnig að hafa samband við útlendingayfirvöld í því landi þar sem þú ert þegar með dvalarleyfi til að fá upplýsingar um hvort danskt leyfi geti haft áhrif á núverandi leyfi þitt.