Kennitala í Danmörku

Dönsk kennitala er notuð til að auðkenna þig í samskiptum við dönsk yfirvöld og í mörgum aðstæðum hjá einkaaðilum, til dæmis bönkum, atvinnurekendum og tryggingafélögum.

Kennitalan tengist miðlægu þjóðskránni, sem yfirleitt er skammstöfuð CPR. Í CPR eru grunnupplýsingar um einstaklinga sem búa eða hafa búið í Danmörku.

Ef þú færð búsetuskráningu í CPR færðu danska kennitölu. Búsetuskráning er einnig kölluð skráning í þjóðskrá.

Hvenær getur þú fengið danska kennitölu?

Þú færð danska kennitölu þegar búsetusveitarfélagið þitt hefur metið að þú uppfyllir skilyrðin fyrir því að vera skráð(ur) sem innflutt(ur) í CPR.

Börn sem fæðast í Danmörku af móður sem þegar er búsetuskráð í CPR fá sjálfkrafa danska kennitölu og eru skráð í CPR.

Ef þú átt ekki að fá búsetuskráningu í CPR getur þú í sumum tilvikum fengið stjórnsýslulega kennitölu. Það gildir til dæmis ef þú þarft danska kennitölu til þess að:

• greiða skatt (úthlutað af Skattestyrelsen)
• fá lífeyri í gegnum ATP (úthlutað af ATP)
• skrá einstakling í kirkjubækur, t.d. við fæðingu eða skírn hjá dönsku þjóðkirkjunni (úthlutað af sókn)
• fá útgefið sérstakt dvalarleyfi (úthlutað af Styrelsen for Arbejdsmarked og Rekruttering)
• skrá diplómata í skrá utanríkisráðuneytisins skv. 1. mgr. 47. gr. laga um útlendinga (úthlutað af utanríkisráðuneytinu).

Þú getur ekki fengið danska kennitölu eingöngu vegna þess að þú þurfir að stofna bankareikning í Danmörku, eða eingöngu vegna þess að þú sért danskur ríkisborgari.

Ef þú átt að starfa eða greiða skatt í Danmörku, en átt ekki að fá búsetuskráningu í CPR, getur þú þurft skattakennitölu.

Skattakennitala er dönsk kennitala sem Skattestyrelsen úthlutar til nota í skattalegum tilgangi. Ef þú flytur síðar til Danmerkur og færð búsetuskráningu í CPR heldur þú að jafnaði þeirri kennitölu sem þú hefur þegar fengið.

Ef þú ert erlendur starfsmaður og færð vinnu í Danmörku þarftu að jafnaði að hafa stafrænt skattkort og skattakennitölu ef þú ert ekki þegar með danska kennitölu.

Ef barnið þitt er fætt erlendis og býr erlendis á það ekki rétt á danskri kennitölu eingöngu vegna þess að það er danskur ríkisborgari.

Barnið fær fyrst danska kennitölu ef það flytur til Danmerkur og uppfyllir skilyrðin fyrir búsetuskráningu í CPR, eða ef dönsk stjórnvöld úthluta því kennitölu í öðru samhengi.

Ef barnið þitt er skírt í dönsku þjóðkirkjunni úthlutar sóknin barninu stjórnsýslulegri kennitölu. Ef barnið flytur síðar til Danmerkur verður það skráð með þessari kennitölu.

Danskt barn getur fengið danskt vegabréf án þess að hafa danska kennitölu.

Í sérstökum tilvikum getur þú fengið nýja kennitölu. Það getur til dæmis átt við ef villa er í núverandi kennitölu þinni eða ef kennitalan er notuð við misnotkun á auðkenni þínu.

Þú getur einnig fengið nýja kennitölu í tengslum við lagalega breytingu á kynskráningu.

Danskar kennitölur samanstanda af tíu tölustöfum. Fyrstu 6 tölustafirnir sýna venjulega fæðingardag einstaklingsins. Síðustu 4 tölustafirnir eru raðnúmer.

• Tölur 1–2 vísa til fæðingardags viðkomandi
• Tölur 3–4 vísa til fæðingarmánaðar viðkomandi
• Tölur 5–6 vísa til fæðingarárs viðkomandi, án árhundraðs.
• Tölur 7–10 eru raðnúmer.

Samsetning 5., 6. og 7. tölustafs sýnir á hvaða öld einstaklingurinn er fæddur. Síðasti tölustafurinn sýnir skráð kyn í CPR. Sléttar tölur eru notaðar fyrir konur og oddatölur fyrir karla.