Húsnæði á Grænlandi

Erfitt er að komast inn á grænlenskan húsnæðismarkað þar sem mikill skortur er á húsnæði, einkum í stærri bæjum. Því er algengt að erlendum ríkisborgurum sem ráðnir eru til starfa á Grænlandi bjóðist starfsmannaíbúðir.

Flytjir þú til Grænlands vegna nýs starfs geturðu haft heppnina með þér og fengið starfsmannahúsnæði gegnum vinnustaðinn. Starfsmannahúsnæði er mikilvægt til að laða vinnuafl til Nuuk en bið eftir opinberu leiguhúsnæði getið tekið 10–12 ár fyrir almenna húsnæðisleitendur.

Mörg einkarekin fyrirtæki eru með starfsmannahúsnæði fyrir starfsfólkið. Farir þú til starfa hjá sveitarfélagi eða Sjálfsstjórninni stendur þér til boða leiguhúsnæði hjá einhverju þeirra húsnæðisfélaga sem hafa umsjón með opinberu leiguhúsnæði á Grænlandi. Hafðu hugfast að þú missir húsnæðið þegar þú segir starfinu upp.

Húsnæðisfélagið INI A/S hefur umsjón með flestu opinberu húsnæði. ó hefur húsnæðisfélagið Iserit Kommuneqarfit umsjón með húsnæði í Sermersooq (opinberu húsnæði í Nuuk, Paamiut, Ittoqortormiit og Tasiilaq). Einkarekið fyrirtæki, Agerskov Consulting, hefur umsjón með húsnæði í Nuuk fyrir húsnæðisfélagið Illuut. Atvinnurekandinn tekur frumkvæði að því að hafa samband við húsnæðisfélag.

Stærð fjölskyldunnar hefur áhrif á stærð húsnæðisins. Fjögurra manna fjölskyldu býðst yfirleitt fjögurra herbergja íbúð. Í stærri bæjum, einkum Nuuk, eru biðlistar langir og því verður fólk að þiggja það húsnæði sem býðst. Þó er hægt að skrá sig á lista þar sem óskað er eftir flutningi.

Húsnæði í einkaeigu hefur fjölgað á Grænlandi eftir að Landsþingið samþykkti hvata fyrir einkarekinn húsnæðismarkað sem fólust í góðum lánakjörum og kerfi sem gerir leigjendum í opinberu húsnæði kleift að kaupa húsnæðið.

Allir lögaðilar og einstaklingar geta keypt sér fasteign á Grænlandi. Hafa ber hugfast að búseturéttarhúsnæði fylgir búsetuskylda.

Á Grænlandi á fólk ekki lóðina sem húsnæði er reist á.

Borgarar, einstaklingar, búseturéttarfélög eða fyrirtæki geta fengið afnotarétt af lóð þar sem t.a.m. er fyrirhugað að byggja hús. Sækja skal um lóðarúthlutun til að fá afnotarétt af þeirri lóð sem óskað er eftir.

Sækja skal um lóðarúthlutun ef ætlunin er að:

• byggja hús eða önnur mannvirki
• kaupa hús – eftir kaupin skal sækja um lóðarúthlutun
• byggja við hús sem fyrir er
• breyta notkun húsnæðis, t.d. úr verslun í íbúðarhúsnæði
• leggja vatns- eða skólpleiðslur
• setja upp gervihnattardisk á lóðinni
• leggja bílastæði
• byggja kofa á opnu svæði
• koma fyrir t.d. gámi eða bát

Sótt er um lóðarúthlutun hjá sveitarfélaginu:

Leitaðu á vefsvæði NunaGIS, sem geymir stafrænt kort af öllu Grænlandi. Á NunaGIS er að finna leiðbeiningar um hvernig sótt er um lóðarúthlutun.

Einnig er hægt að hafa samband við þjónustumiðstöð eða bæjarskrifstofu og fá leiðbeiningar þar.