Svansmerktar vörur eiga að leiða til þróunar markaðarins til sjálfbærni

„Það á að vera einfalt fyrir neytendur að stuðla að hringrásarhagkerfi og sjálfbærum umskiptum í loftslagsmálum. Þess vegna viljum við auka umfang Svansins þannig að hann nái til fleiri vöruflokka,“ segir Åsa Karlsson, fulltrúi sænskra jafnaðarmanna í norrænu sjálfbærninefndinni þegar tillagan var til meðferðar á þingfundi á Norðurlandaráðsþinginu. 

Ákvörðunin varð sú að Norðurlandaráð fer þess á leit við ráðherranefndina að skilgreindir verði vöruflokkar sem gætu farið inn í Svansmerkinguna og þar með stuðlað að hringrásarhagkerfi.  Norsk rannsókn frá 2018 sýnir að áætlaður líftími raftækja er að styttast - þetta er þróun sem neytendur geta alls ekki stýrt.  Viðskiptalíkan framleiðenda byggist yfirleitt á því að selja nýja vöru í stað þess að gera við. Þetta hefur leitt til þess að raftækjarusl er sá úrgangsstraumur heims sem vex örast. 

Í 30 ár hefur Svanurinn hjálpað norrænum neytendum að velja umhverfisvænt - og leitt til þróunar markaðarins í átt til meiri sjálfbærni. Til þess að vara eða þjónusta geti fengið Svansmerki er allur ferill vörunnar frá hráefni til úrgangs metinn. Meira en 25.000 vörutegundir eru nú með umhverfismerki, allt frá húsum til hlutabréfasjóða og kynlífshjálpartækja.