Einn milljarður skógarmaura getur ekki haft á röngu að standa
Ástæða þess að mikill hluti þeirra tegunda sem eru á válista í norrænu ríkjunum finnast í skógi er að upprunalegt landslag Norðurlandanna var auðugt af skógi og að margar af tegundum okkar tengjast þess háttar svæðum.
Skógurinn er enn afar auðugur af tegundum.
Í Svíþjóð eru 10.000 tegundir í skóginum. Þetta eru mosar, fléttur og sveppir, skordýr og fuglar. 20 prósent þeirra eru í hættu eða í viðkvæmri stöðu.
Það hefur áhrif á fjölda tegunda í norrænu skógunum þegar lífsskilyrði þeirra breytast eða hverfa. Skógarhögg, byggingar, órækt, loftslagsbreytingar, losun köfnunarefna – allt hefur þetta áhrif á fjölbreytileika tegundanna.
Í sumum Norðurlandanna hefur skógrækt verið grundvallaratvinnuvegur áratugum saman – þetta hefur sett mark sitt á skógana. Í skógi sem er nýttur er einfaldlega minna rými fyrir lífríki þeirra villtu dýra og plöntutegunda sem finna má í gömlum og ósnortnum skógi. Sænski tegundagagnagrunnurinn bendir á að skortur á skógi sem ekki er nýttur sé ein mikilvægasta ástæða þess að tegundir skóganna séu í útrýmingarhættu eða viðkvæmri stöðu.
Jafnvel þótt Norðurlöndin hafi áður verið meðal þeirra sem samþykktu metnaðarfull markmið um að varðveita líffræðilega fjölbreytni þá eru miklir hagsmunaárekstrar í skóginum. Auk þess tekur það vistkerfi skógar sem hefur verið nýttur, mörg ár að ná aftur upp þeim margbreytileika sem hann hafði áður. Við viljum fá hráefnið okkar eins og venjulega - og nú viljum við líka að lífeldsneyti leysi jarðefnaeldsneyti af hólmi. Mikilvægt er að sjá til þess að vinnsla lífeldsneytis komi ekki niður á þeim tegundum sem eru háðar skóglendi.
Skógurinn gegnir ríku hlutverki í loftslagsstefnu - en hann er meðal þeirra svæða þar sem loftslagsstefna getur komið niður á líffræðilegri fjölbreytni.
Hvernig var það aftur með maurana?
Jú takk, það var fínt! Þeir liðsinna eigendum skóganna við að halda meindýrum í skefjum og stuðla um leið að örari vexti skóganna.
Staðreyndir:
- Samkvæmt rannsóknarnefnd SÞ um líffræðilega fjölbreytni hafa 290 milljónir hektara af skógi verið höggnir síðan 1990.
- Í Svíþjóð tengjast 43 prósent tegunda á válista skógum, 32 prósent í Finnlandi og 60 prósent í Danmörku.
- Í Noregi tengjast 48 prósent tegunda í hættu skógunum.
Þetta getur þú gert:
- Gættu skógarins og aflaðu þér nánari upplýsinga um hann.
- Plantaðu blómstrandi runnum og trjám í garðinum þínum.
- Hættu að henda rusli í skóginn.
- Notaðu skóginn – hann er góður fyrir heilsuna!
