Samkomulag um norræna fjárhagsáætlun fyrir árið 2023 liggur fyrir

Árið 2019 samþykktu norrænu forsætisráðherrarnir metnaðarfulla framtíðarsýn: Norðurlönd eiga að verða sjálfbærasta og samþættasta svæði heims árið 2030. Framtíðarsýnin felur í sér þrjú stefnumarkandi áherslusvið sem miða að því að Norðurlönd verði í fararbroddi þegar kemur að grænum umskiptum, félagslegri sjálfbærni og samkeppnishæfni. Til að geta uppfyllt framtíðarsýnina og eflt grænar aðgerðir var hafist handa við endurúthlutun fjármagns á tímabilinu 2021-2024.

Norðurlandaráði gafst færi á að koma með tillögur varðanda fjárhagsáætlun fyrir árið 2023 og óskaði meðal annars eftir því í ljósi faraldursins að framlög til menningar, menntunar og samstarfs á sviði viðbúnaðar yrðu aukin. Í heildina skiluðu tillögur Norðurlandaráðs sér í verkefnum fyrir 22,5 milljónir danskra króna. Meðal annars eru 8,75 milljónir danskra króna færðar til menningarsviðs og 6,5 milljónir til menntunarsviðs ásamt því að 3 milljónir fara til verkefna fyrir ungt fólk á sviði loftslagsmála og líffræðilegrar fjölbreytni.

„Ég tel að við höfum komist að skynsamlegu samkomulagi um fjárhagsáætlunina fyrir árið 2023 þar sem framtíðarsýnin er í fyrirrúmi um leið og okkur hefur tekist að leggja áherslu á tillögur Norðurlandaráðs,“ segir samstarfsráðherra Noregs, Anne Beathe Tvinnereim.

„Sameiginleg menning, tungumál og menntun er hornsteinninn í menningarlegri samkennd Norðurlanda. Það gleður mig því mjög að hið góða samráð við Norrænu ráðherranefndina hafi skilað sér í 15 milljónum aukalega menningar- og menntasviðsins í fjárhagsáætlun fyrir árið 2023,“ segir Erkki Tuomioja, forseti Norðurlandaráðs.