Réttur til heilsugæslu í Svíþjóð

Ret til sundhedsydelser i Sverige
Lestu um rétt þinn til heilsugæslu í Svíþjóð.

Þú átt rétt á heilsugæslu þegar þú býrð í Svíþjóð. Þú greiðir yfirleitt komugjald þegar þú nýtir þér heilbrigðisþjónustu. Sveitarfélög og landsþing eða svæðisstjórnir hafa umsjón með heilsugæslunni í Svíþjóð.

Almannatryggingar sjá um niðurgreiðslu tannlækningakostnaðar. Ef þú hefur sérstaka þörf fyrir tannlækningar áttu einnig rétt á tannlækningum hjá landsþingi þínu eða svæðisstjórn.

Ef þú veikist þegar þú býrð eða starfar í Svíþjóð

Ef þú hefur tilkynnt flutning og ert með lögheimili í Svíþjóð ertu einnig almannatryggð/ur í Svíþjóð og átt rétt á heilbrigðis- og tannlæknaþjónustu eins og aðrir íbúar Svíþjóðar. Einungis er hægt að eiga aðild að almannatryggingum í einu landi í senn. Almannatryggingar veita fjárhagslega aðstoð fjölskyldum og börnum, einstaklingum með fötlun og einnig þeim sem veikjast, verða fyrir vinnuslysum eða öldruðum.

Ef þú átt aðild að almannatryggingum í Svíþjóð áttu rétt á að fá evrópska sjúkratryggingakortið í Svíþjóð. Kortið veitir þér rétt til heilsugæslu og tannlækninga þegar þú dvelst í öðru ESB/EES-landi eða Sviss.

Ef þú veikist þegar þú býrð í Svíþjóð en starfar í öðru norrænu landi

Ef þú býrð í Svíþjóð en stundar vinnu í öðru norrænu landi áttu yfirleitt aðild að almannatryggingum í starfslandinu. Ef þú veikist áttu rétt á læknishjálp og tannlækningum í starfslandinu en einnig aðgang að læknishjálp og tannlækningum í Svíþjóð.

Þú sækir um með eyðublaðinu „Intyg om rätt till vårdförmåner i Sverige“ hjá Försäkringskassan.

Ef þú veikist á meðan þú dvelst tímabundið í Svíþjóð

Ef þú kemur frá öðru norrænu landi áttu rétt á nauðsynlegri heilsugæslu og bráðatannlækningum á sömu kjörum og íbúar Svíþjóðar þrátt fyrir að þú dveljist aðeins tímabundið í Svíþjóð og eigir ekki lögheimili þar í landi. Þú þarft að framvísa gildum persónuskilríkjum, vegabréfi eða ökuskírteini. Auk þess þarftu að gefa upp heimilisfang þitt í búsetulandinu.

Ráðgerðu læknismeðferð í norrænu landi

Þú getur ráðgert læknismeðferð í öðru norrænu landi. Það getur verið tími hjá sérfræðilækni, aðgerð eða meðferð við tilteknum sjúkdómi.

Ef þú býrð í Svíþjóð og ráðgerðir meðferð í útlöndum geturðu sótt um fyrirfram leyfi eða staðfestingu hjá Försäkringskassan í Svíþjóð. Þú getur einnig greitt fyrir meðferðina erlendis og sótt um endurgreiðslu þegar heim er komið.

Ef þú býrð annars staðar á Norðurlöndum og sækir um ráðgerða meðferð í Svíþjóð þarftu annað hvort að vera með fyrirfram leyfi frá búsetulandinu áður en þú pantar meðferð erlendis. Eða hafa samband við yfirvöld í búsetulandinu til þess að kanna hvaða reglur gilda um endurgreiðslur á útlögðum kostnaði fyrir meðferð sem þú ráðgerir í Svíþjóð.

Heilbrigðisþjónusta í Svíþjóð þegar þú dvelst tímabundið erlendis

Ef þú stundar nám í öðru norrænu landi skemur en í eitt ár áttu sama rétt á heilsugæslu og tannlækningum í Svíþjóð og þegar þú bjóst í Svíþjóð

Ef þú stundar nám í öðru norrænu landi lengur en í eitt ár geturðu átt sama rétt á heilsugæslu og tannllækningum í Svíþjóð og þegar þú bjóst í Svíþjóð en til þess þarftu að byrja á því að sækja um eyðublaðið „Intyg om rätt till vård i Sverige“ hjá Försäkringskassan.

Þú átt einnig rétt á nauðsynlegri heilbrigðisþjónustu í námslandinu. Ef þú stundar nám í öðru norrænu landi er nóg að þú sýnir skilríki og gefir upp heimilisfangið þitt til að fá nauðsynlega þjónustu.

Ef þú óskar eftir heilbrigðisþjónustu sem getur beðið þar til þú snýrð aftur heim þarftu að greiða fyrir hana úr eigin vasa. Þú getur sótt um undanþágu hjá Försäkringskassan. Í sumum tilvikum geturðu sótt um fyrirfram um leyfi eða staðfestingu á ráðgerðri meðferð erlendis.

Heilbrigðisþjónusta í Svíþjóð þegar þú býrð í Svíþjóð en starfar í fleiri en einu landi

Ef þú býrð í Svíþjóð en stundar vinnu í að minnsta kosti tveimur Norðurlandanna ber þér að tilkynna það til Försäkringskassan. Försäkringskassan kannar þá hvort þú uppfyllir skilyrði til að vera áfram almannatryggð/ur í Svíþjóð.

Ef þú ert útsendur starfsmaður, hefur fengið undanþágu eða starfar í tveimur eða fleiri löndum samtímis þarftu að taka með þér eyðublaðið A1 (til Danmerkur og Finnlands) eða E 101 (til Íslands og Noregs). Eyðublöðin fást hjá Försäkringskassan. Þar kemur fram í hvaða landi þú ert almannatryggð/ur.

Hvað kostar heilbrigðisþjónusta og er hægt að fá niðurgreiðslu?

Í Svíþjóð ákveða landsþingin og svæðisstjórnir hvaða gjöld þér er gert að greiða fyrir læknisrannsóknir og aðra heilbrigðisþjónustu. Upphæð komugjalda fer eftir landsþinginu eða svæðinu þar sem þú býrð. Niðurgreiðslur setja þak á greiðslur einstaklinga á ári.

Ef þú ert almannatryggð/ur í Svíþjóð áttu rétt á tannlækningum þér að kostnaðarlausu upp að 23 ára aldri. Þegar þú verður 24 ára áttu rétt á niðurgreiðslum frá ríkinu á tannlækningum. Niðurgreiðslur á tannlækningum fara eftir aldri þínum og kostnaði meðferðarinnar. Ef þú átt við veikindi að stríða eða fötlun geturðu fengið hærri aðstoð en ella.

Endurgreiðslur á heilbrigðisþjónustu sem þú hefur greitt fyrir í öðru norrænu landi.

Tannlækningar í öðru norrænu landi

Niðurgreiðslur á tannlækningum í öðru norrænu landi eru undir því komnar að

þú sért almannatryggð/ur vegna heilbrigðisþjónustu í Svíþjóð;

sú meðferð sem þú ráðgerir hefði verið greidd af hinu opinbera eða þú hefðir átt rétt til niðurgreiðslu frá ríkinu á tannlækningum ef þú hefðir fengið meðferðina í Svíþjóð;

meðferðin sé í höndum heilbrigðisstarfsfólks með fagleg starfsréttindi.

Þú getur aldrei fengið hærri endurgreiðslu en sem nemur þeirri upphæð sem samsvarandi meðferð hefði kostað í Svíþjóð eða sem þú greiddir úr eigin vasa. Það þýðir að ef tannlækningarnar voru dýrari í því landi sem þær voru veittar greiðir þú mismuninn úr eigin vasa.

Heilbrigðisþjónusta í öðru norrænu landi

Endurgreiðslur vegna heilbrigðisþjónustu í öðru norrænu landi eru undir því komnar að

þú sért almannatryggð/ur vegna heilbrigðisþjónustu í Svíþjóð;

sú meðferð sem þú ráðgerir hefði verið greidd af hinu opinbera ef þú hefðir fengið meðferðina í Svíþjóð;

meðferðin sé í höndum heilbrigðisstarfsfólks með fagleg starfsréttindi;

þú hafir greitt meira en komugjaldið í landinu sem þú fékkst meðferðina.

Þú getur aldrei fengið hærri endurgreiðslu en sem nemur þeirri upphæð sem samsvarandi meðferð hefði kostað í Svíþjóð eða sem þú greiddir úr eigin vasa. Það þýðir að ef meðferðin var dýrari í því landi sem hún var veitt en í Svíþjóð þá greiðir þú mismuninn úr eigin vasa

Hvar færðu svör við spurningum þínum?

Nánari upplýsingar er að vinna á vefsíðu Försäkringskassan. Þú getur líka hringt í þjónustuver Försäkringskassan: +46 (0)771–524 524.

Nánari upplýsingar

Samband við yfirvöld
Spurning til Info Norden

Ef þú ert með spurningu skaltu fylla út eyðublaðið hérna:

ATH: Ef spurningin þín varðar afgreiðslu tiltekins máls eða umsóknar eða annarra persónulegra mála skaltu hafa samband við viðkomandi yfirvald.

Info Norden er upplýsingaþjónusta Norrænu ráðherranefndarinnar. Við gefum upplýsingar til fólks sem vill flytja, vinna, stunda nám, leita styrkjum eða hefja rekstur í öðru norrænu landi.
Leitaðu að skrifstofu Info Norden hérna