Tollareglur í Danmörku

Séstakar reglur gilda um hvað má hafa með sér tollfrjálst þegar flutt eða komið er til Danmerkur.

Ef þú flytur frá ESB-landi til Danmerkur er almenna reglan sú að þú getir tekið búslóðina með þér án þess að þurfa að greiða af henni toll. Ef frekari spurningar vakna má leita til Toldstyrelsen.

Þegar þú sem einstaklingur flytur til Danmerkur frá landi utan ESB, eins og t.d. Íslandi eða Noregi, er almenna reglan sú að greiða beri tolla og virðisaukaskatt af persónulegum eignum. Þó er hægt að flytja inn persónulegar eignir án þess að greiða tolla og virðisaukaskatt ef þær uppfylla ákveðin skilyrði.

Til persónulegra eigna telst innbú, s.s. húsgögn, fatnaður, reiðhjól, eldhúsáhöld og heimilistæki. Gerð er krafa um að þú hafir átt og nýtt eignir þínar í a.m.k. sex mánuði áður en þú getur flutt þær með þér án þess að greiða toll.

Þegar eigur þínar koma þarftu að sjá til þess að útbúin sé yfirlýsing um innflutning. Til þess er notað sérstakt eyðublað, „enhedsdokument“. Yfirleitt sér flutningsfyrirtækið um að útbúa yfirlýsinguna.

Einnig þarftu að fylla út yfirlýsingu um búslóð. Eyðublaðið er notað til að veita upplýsingar um hlutina og lýsa því yfir við tollayfirvöld að þeir samræmist reglum um tollfrelsi.

Einnig er um fleiri skilyrði að ræða sem lesa má um á heimasíðu Toldstyrelsen þar sem einnig má finna hlekki á skjölin sem þarf að fylla út.