Bíll í Danmörku

Að jafnaði þarf bíllinn þinn að vera skráður í Danmörku ef þú býrð í landinu. Ef þú býrð í Danmörku og átt bíl sem er skráður í Danmörku þarftu einnig að hafa lögboðna ábyrgðartryggingu í Danmörku.

Skráning bíls þegar þú flytur til Danmerkur

Þegar þú flytur til Danmerkur þarf að skrá bílinn þinn eða bifhjólið í Danmörku og hann þarf að fá danskar númeraplötur. Greiða þarf skráningargjald til að fá danskar númeraplötur. Þú hefur 30 daga frá flutningnum til að skrá ökutækið.

Til að skrá ökutækið þitt þarftu að fara í gegnum fimm skref:

1. Tilkynna Motorstyrelsen um ökutækið.
2. Láta skoða bílinn eða bifhjólið.
3. Óska eftir verðmati hjá Motorregistret eða hjá einkaaðila.
4. Greiða skráningargjald. Hægt er að óska eftir því að greiða skráningargjald á ársfjórðungsgrundvelli ef aðeins stendur til að nota ökutækið í takmarkaðan tíma.
5. Láta skrá ökutækið í Motorregistret og kaupa nýjar númeraplötur.

Nánari upplýsingar um það sem þarf að gera eru á heimasíðu Motorstyrelsen.

Frá ESB-landi

Þegar flutt er til Danmerkur frá öðru ESB-landi þarf alla jafna ekki að greiða tolla af ökutæki. Ef þú hefur spurningar geturðu haft samband við Toldstyrelsen. 

Frá landi utan ESB

Þegar þú flytur inn ökutæki frá landi utan ESB, til dæmis Færeyjum, Grænlandi, Íslandi eða Noregi, þarftu að jafnaði að greiða toll og virðisaukaskatt. Tollurinn er 10% og virðisaukaskattur er 25% af kaupverði, flutningskostnaði utan ESB og umsýslukostnaði. Í sumum tilvikum, til dæmis ef ökutækið er hluti af búslóð, er hægt að flytja það inn án tolla og virðisaukaskatts eða með lægri tolli eða virðisaukaskatti.

Í mörgum tilvikum er hægt að fá skráningargjaldið endurgreitt ef ökutækið er flutt út frá Danmörku og það er afskráð hjá Motorregistret. Útflutningsuppbótin getur ekki verið hærri en skráningargjaldið sem upphaflega var greitt fyrir ökutækið. Nánari upplýsingar er að finna á heimasíðu Motorstyrelsen.

Að jafnaði máttu ekki aka ökutæki með erlendum númeraplötum ef þú býrð sjálf/ur í Danmörku. Ef þú flytur til Danmerkur og ert með bíl á erlendum númeraplötum þarftu að skrá bílinn í Danmörku eigi síðar en 30 dögum eftir að þú fluttir til landsins.

Ef þú átt búsetu í fleiri en einu landi getur Motorstyrelsen ákveðið hvar þú telst eiga heimilisfesti. Ef þú ert ekki viss um hversu lengi þú hyggst dvelja í Danmörku eða hvar þú átt heimilisfesti getur þú sótt um leyfi hjá Motorstyrelsen til að aka með erlendum númeraplötum í Danmörku.

Þú getur fengið leyfi til að aka með erlendar númeraplötur í 30 daga ef þú:

• flytur inn ökutæki
• hefur fengið ökutæki lánað hjá erlendu bílaverkstæði vegna þess að þinn eigin bíll þarf að fara í þjónustu erlendis
• þarft að prófa búnað fyrir ökutæki eða prófa ökutæki sem skráð er erlendis. Prófunin þarf að vera í atvinnuskyni. Þú getur því ekki sótt um leyfi ef þú sem einstaklingur vilt prufukeyra ökutæki sem þú ert að íhuga að kaupa. 

Í þessum þremur tilvikum þarftu að senda eyðublaðið „Kørsel i Danmark på udenlandske plader“ til Motorstyrelsen í gegnum skat.dk áður en þú kemur yfir landamærin til Danmerkur.

Ef þú átt bíl, bifhjól eða skellinöðru sem er ekið á opinberum vegi er skylt að ökutækið sé ábyrgðartryggt. Tryggingin nær til tjóns sem þú veldur öðrum sem eigandi eða notandi ökutækis. 

Þér er frjálst að ákveða hvort þú vilt kaskótryggja bílinn til viðbótar við ábyrgðartrygginguna. Ef þú hefur tekið lán fyrir bílnum eða keypt hann með afborgunum er það þó yfirleitt krafa tryggingafélagsins að bíllinn sé kaskótryggður. 

Þú getur lesið meira um tryggingar á borger.dk og hjá Forsikringsoplysningen.

Bíllinn þinn þarf að fara í reglubundna bifreiðaskoðun. Reglubundin bifreiðaskoðun er eftirlit með því að ökutækið þitt uppfylli gildandi reglur um samþykki og skoðun ökutækja. 

Tvö meginmarkmið bifreiðaskoðunar eru að tryggja:

• atriði sem varða umferðaröryggi, svo sem athugun á stýrisbúnaði, dekkjum, ljósum, stefnuljósum, endurskini og burðarhlutum, meðal annars hjólabúnaði og höggdeyfum
• umhverfislega þætti, svo sem athugun á reyk, kolmónoxíði og hávaða.

Hvenær ökutækið þitt þarf að fara í skoðun fer eftir því hvers konar ökutæki þú átt. Til dæmis þarf venjulegur fólksbíll að fara í reglubundna skoðun fjórum árum eftir að hann var fyrst skráður og síðan annað hvert ár.

Færdselsstyrelsen sendir þér boð í reglubundna skoðun átta vikum fyrir skoðanafrestinn. Þegar þú hefur fengið boð í bifreiðaskoðun þarftu sjálf/ur að hafa samband við viðurkennt skoðunarfyrirtæki.

Til þess að mega aka bifreið, vörubíl, rútu, skellinöðru eða bifhjóli í Danmörku þarf að hafa gilt ökuskírteini. Einnig þarf ökuskírteini til að aka með stóran aftanívagn. Ef þú ert 15, 16 eða 17 ára þarftu ökuskírteini til að mega aka lítilli skellinöðru.

Á síðu Info Norden um ökuskírteini í Danmörku geturðu lesið um hvaða ökuskírteini eru gild í Danmörku, hvernig þú getur tekið og endurnýjað ökuskírteini í Danmörku og hvernig þú getur skipt erlendu ökuskírteini út fyrir danskt.

Hámarkshraði

Hámarkshraði gildir fyrir fólksbíla, sendibifreiðar og mótorhjól, en sérstakar reglur gilda um vörubíla, rútur og fólksbíla með tengdan eftirvagn, til dæmis tjaldvagn. Almennur hámarkshraði í Danmörku er:

• 50 km/klst. í þéttbýli
• 80 km/klst. utan þéttbýlis
• 130 km/klst. á hraðbraut.

Annar hámarkshraði kann að vera tilgreindur á skiltum og honum þarftu að fylgja.

Sumar- og vetrardekk

Ekki er almenn krafa um að nota vetrardekk að vetri til í Danmörku. Þú mátt þó ekki halda akstri áfram á dekkjum sem eru augljóslega óhentug fyrir veður og færð. Nagladekk eru leyfð frá 1. nóvember til 15. apríl.

Prómillmörk

Þú mátt ekki aka bíl ef áfengismagn í blóði er meira en 0,5 prómill. Þú getur verið dæmd/ur fyrir ölvunarakstur þó að prómillmagn í blóði sé undir 0,5 ef lögreglan metur að þú getir ekki ekið bíl með öruggum hætti.

Prómillmörkin eru 0,2 fyrir nýja ökumenn með ökuskírteini fyrir venjulegan fólksbíl fyrstu þrjú árin eftir að þeir fengu ökuskírteini.

Í Danmörku þurfa vörubílar sem eru 12 tonn eða þyngri að greiða kílómetratengt veggjald á hluta danska vegakerfisins. Gjaldið fer meðal annars eftir því hversu langt vörubílnum er ekið og hversu mikið CO2 hann losar.

Einnig skal greiða vegatolla fyrir öll ökutæki sem aka yfir Stórabeltisbrúna og Eyrarsundsbrúna.

Ef þú hefur spurningar um skráningu bíls, skráningargjald eða notkun erlends bíls í Danmörku skaltu hafa samband við Motorstyrelsen.

Ef spurningar vakna um tolla og virðisaukaskatt má hafa samband við Toldstyrelsen.

Ef þú hefur spurningar um reglubundna bifreiðaskoðun skaltu hafa samband við Færdselsstyrelsen.